Ўзбекистонликлардан яна бир дорини истеъмол қилмаслик сўралди

Dr. Reddy’s Laboratories Ltd компанияси томонидан ишлаб чиқарилган «Телсартан H» дори воситасининг айрим сериялари муомаладан қайтариб олинмоқда. Бу ҳақда Фармацевтика маҳсулотлари хавфсизлиги маркази компаниянинг Ўзбекистондаги ваколатхонасидан келиб тушган расмий маълумотга таяниб хабар берди.

Қайд этилишича, ишлаб чиқарувчи томонидан ўтказилган сифат назорати ва барқарорлик синовлари натижасида «Телсартан H 80 мг/12,5 мг» дори воситасининг C2501976 сериясида фаол модда — гидрохлоротиазид миқдори белгиланган меъёрлардан четга чиққани аниқланган. Ушбу ҳолат препаратнинг сифат кўрсаткичлари бўйича номувофиқлик сифатида баҳоланган.

Таъкидланишича, Ўзбекистон ҳудудида муомалага киритилган C2501977 серияси бўйича фаол модда миқдорига оид бундай номувофиқлик қайд этилмаган. Бироқ мазкур серия номувофиқлик аниқланган серия билан бир хил ишлаб чиқариш лотига мансуб фаол моддадан тайёрлангани сабабли, дори воситалари муомаласи хавфсизлигини таъминлаш ва эҳтимолий хавфларнинг олдини олиш мақсадида профилактик чоралар доирасида бозордан қайтариб олинмоқда.

«Шу муносабат билан, кўрсатилган сериядаги «Телсартан H 80 мг/12,5 мг» препаратини сотиб олган фуқаролардан ушбу дори воситасини истеъмол қилмаслик, агар мавжуд бўлса ундан фойдаланишни тўхтатиш ҳамда зарурат туғилганда даволовчи шифокор билан маслаҳатлашган ҳолда муқобил дори воситасини танлаш сўралади», - дейилган хабарда.