100 дан ортиқ конлар тақдири: «Санег» қарзлари бўйича қарор кутилмоқда

2019-йилда ҳукуматнинг ёпиқ қарори билан 100 дан ортиқ конлар «Ўзбекнефтгаз» аксиядорлик жамиятидан Саноат Энергетика Гуруҳи (Санег) бошқарувига ўтказилган эди. Ҳозирги кунда «Санег»нинг «Ўзбекнефтгаз» олдида қарздорлиги юзаган келган ва уни ундириш учун алоҳида тартиб ишлаб чиқилган. Бу ҳақда «Ўзбекнефтгаз» бошқарув раисининг молия, трансформация ва хусусийлаштириш бўйича биринчи ўринбосари Суҳроб Ҳамроев кеча, 20-апрел куни бўлиб ўтган матбуот анжуманида маълум қилди.

«Санег» компаниясининг мол-мулкларига келадиган бўлсангиз, ростдан ҳам қайсидир мулклар «Санег» компаниясига вақтинчалик берилган. Ҳозирда улар фаолият кўрсатиб келмоқда. Бу бўйича ҳам энди алоҳида ишчи гуруҳ тузилди. Ишчи гуруҳдан ташқари, уларнинг ҳозирги жорий, яъни бизнинг хизмат кўрсатишимиздан юзага келган қарздорликларини ундириш бўйича алоҳида тартиб ишлаб чиқилди. Яъни, бу Молия вазирлиги томонидан амалга оширилади: уларнинг экспортидан тушадиган маблағлар алоҳида ҳисоб-ғазнасига йиғиляпти ва ўша ғазнадан йиғиладиган маблағлар, биринчи навбатда, «Ўзбекнефтгаз» олдидаги қарздорликни ундиришга йўналтирилади», – деди Суҳроб Ҳамроев.

Унинг айтишича, «Санег» компанияси алоҳида ҳисоб-ғазнасидаги маблағни тақсимланмайди. У сумма Молия вазирлиги томонидан автоматик тарзда тақсимланади.

«Мол-мулклари бўйича алоҳида, мен билишимча, ишчи гуруҳ тузилган. «Санег» жамиятида барча шу маблағлар, ҳозирги қарздорликлар бўйича ҳисоб-китоб қилиниб, ишчи гуруҳнинг хулосасига асосан, кейин қанақадир қарор қабул қилинади. Бу бизнинг нефт-газ ваколатимизда эмас», – деди Ҳамроев.

Матбуот анжуманида қатнашган «Ўзбекнефтгаз» бош геологи Нодир Муҳиддинов эса республикада ишлаётган конларнинг ярми «Ўзбекнефтгаз»га тегишли эканини айтди.

«Ҳозирги пайтда деярли ишлатилаётган конларни «Ўзбекнефтгаз» компаниясига қарашли республика ҳажмидан олиб қаралса, 50 фоизи Ўзбекнефтгаз компанияси томонидан ишлатилади. Республиканинг захирасига нисбатан 50 фоизи «Ўзбекнефтгаз» компаниясига тегишли», – деди у.

«Санег» қандай компания?

Саноат Энергетика Гуруҳи (собиқ Jizzax Petroleum) Ўзбекистондаги энг йирик нефт ва газ компанияларидан биридир. Бугунги кунда «Санег»га геология-қидирув ва фойдали қазилмаларни қазиб олиш учун тегишли равишда ва лицензиялар рўйхатдан ўтказилган ҳолда 103 та нефт ва газ конларига ер қаъридан ҳамда ер қаъри участкаларидан фойдаланиш ҳуқуқи берилган.

Компанияда нафақат нефт ва газ, балки хомашё қайта ишланиб, юқори қўшимча қийматга эга бўлган бензин, дизел, нефт, авиакеросин ва бошқа қатор маҳсулотлар ишлаб чиқарилади. Қайта ишлаш 2022-йил май ойидан бошлаб «Санег» таркибига кирувчи Фарғона нефтни қайта ишлаш заводида амалга оширилмоқда. Ёқилғи Ўзбекистон Республикаси бўйлаб компания ҳамкорларининг чакана савдо тармоқлари орқали сотилади.

2019-йилда ҳукуматнинг ёпиқ қарори билан 100 дан ортиқ конлар «Ўзбекнефтгаз» аксиядорлик жамиятидан «Санег» бошқарувига ўтказилган. Конларнинг берилиши 2020−2030-йилларга мўлжалланган нефт қазиб олишни ошириш лойиҳаси билан боғлиқ бўлиб. Лойиҳа 2,68 млрд доллар инвестиция киритиш, 800 та янги қудуқ бурғулаш ва яна 500 тасини капитал таъмирлашни назарда тутган. «Санег» 2022-йил якунларига кўра 545,4 минг тонна нефт қазиб олинганини маълум қилган, дастур лойиҳасида 614,7 минг тонна кўрсатилган эди.