2025 йилда Ўзбекистон 11 та мамлакатга гуруч экспорт қилган
Ўтган йил давомида Ўзбекистон гуруч экспорти ҳажми ошди, асосий харидор сифатида Қозоғистон етакчи ўринни эгаллади.
Ўзбекистон 2025 йилнинг январ–ноябр ойларида жами 11 та хорижий давлатга 14,8 минг тонна гуруч экспорт қилди. Экспорт қилинган маҳсулотнинг умумий қиймати 6,4 млн АҚШ долларини ташкил этди. Бу кўрсаткич мамлакат агросаноат соҳасида экспорт йўналишларини диверсификация қилишга қаратилган саъй-ҳаракатлар самара бераётганини кўрсатади.
Ўзбекистон гуручининг асосий ҳаридорлари ким?
Миллий статистика қўмитаси маълумотларига кўра, ҳисобот даврида Қозоғистон Ўзбекистон гуручининг энг йирик импортчиси бўлган. Ушбу давлатга 8 минг тонна гуруч етказиб берилган бўлиб, бу умумий экспорт ҳажмининг салмоқли қисмини ташкил этган. Натижада Қозоғистон Ўзбекистон гуручининг асосий ташқи бозори сифатида қайд этилди.
Иккинчи ўринда Тожикистон жойлашган. Ушбу мамлакатга 3,4 минг тонна гуруч экспорт қилинган бўлиб, бу икки томонлама савдо алоқаларининг барқарор ривожланиб бораётганини кўрсатади. Учинчи ўринни эса Қирғизистон эгаллаб, у ерга 2,4 минг тонна маҳсулот етказиб берилган.
Шунингдек, Ўзбекистон гуручи узоқ бозорларга ҳам чиққани қайд этилди. Хусусан, АҚШга 824,8 тонна гуруч экспорт қилинган. Бундан ташқари, Афғонистон ва Туркияга 45,2 тоннадан маҳсулот етказиб берилган, қолган давлатларга эса жами 113,5 тонна гуруч экспорт қилинган.
Мутахассислар фикрича, гуруч экспорти географиясининг кенгайиши ташқи бозорлардаги талабни қондириш, экспорт салоҳиятини ошириш ҳамда қишлоқ хўжалигида қўшимча қиймат занжирларини ривожлантиришда муҳим аҳамият касб этади.
