2025 йилда Ўзбекистонга энг кўп инвестицияларни Хитой киритди
Ўтган йил давомида иқтисодиётга катта ҳажмда хорижий сармоя киритилиб, ташқи капитал улуши ялпи ўсишнинг асосий драйверига айланди.
2025 йил якунларига кўра, Ўзбекистон иқтисодиётига жами 43,1 млрд доллар инвестиция жалб этилди. Бу кўрсаткич 2024 йилга нисбатан 8,3 млрд долларга, яъни 24 фоизга юқори бўлиб, мамлакат инвестиция муҳитининг сезиларли даражада яхшиланганини кўрсатади. Энг катта сармоя манбаи сифатида Хитой етакчи ўринни эгаллади.
Маълум бўлишича, жалб этилган маблағларнинг асосий қисми — 38,2 млрд доллари тўғридан-тўғри хорижий инвестициялар ҳиссасига тўғри келди. Қолган 4,9 млрд доллар эса халқаро молия институтлари томонидан ажратилган ресурслардан иборат бўлди. Бу ҳолат хусусий капиталнинг иқтисодиётдаги роли ортиб бораётганини англатади.
Ўзбекистон Президенти Олий Мажлис ва халққа йўллаган Мурожаатномасида 2025 йил якунлари бўйича мамлакат ялпи ички маҳсулоти илк бор 145 млрд доллардан ошганини маълум қилган эди. Натижада йил давомида жалб этилган инвестициялар ЯИМнинг қарийб 30 фоизига тенг бўлди, бу эса иқтисодий ўсишда инвестиция фаоллигининг ҳал қилувчи аҳамиятга эга эканини кўрсатади.
Инвестиция киритишда Хитой билан бир қаторда Россия, Туркия, Саудия Арабистони ва Бирлашган Араб Амирликлари ҳам энг фаол давлатлар қаторига кирди. Ушбу мамлакатлар саноат, инфратузилма, энергетика ва хизматлар соҳаларидаги йирик лойиҳаларда иштирок этди.
Шунингдек, халқаро йирик компания ва молиявий институтлар ҳам Ўзбекистон бозорига кириб келди. Германиянинг «Volkswagen», Япониянинг «Sojitz» компанияси, АҚШнинг «Citigroup» ва «Franklin Templeton» каби тузилмалари мамлакатдаги инвестиция муҳитининг турли йўналишларга кенгаяётганини кўрсатади.
