2026 йилги Жаҳон чемпионати чипталарига талаб 500 миллиондан ошди
Чипталар савдосида энг юқори талаб 27 июн куни Маями шаҳрида бўлиб ўтадиган Колумбия — Португалия учрашувига бўлган.
FIFA маълумотларига кўра, 2026 йилги футбол бўйича Жаҳон чемпионати учун чипталарга бўлган талаб 500 миллиондан ошди. Бу кўрсаткич турнирга бўлган глобал қизиқиш мисли кўрилмаган даражага етганини англатади.
ФИФА қайд этишича, чипталарга энг кўп сўров мезбон давлатлардан ташқари Германия, Англия, Бразилия, Испания, Португалия, Аргентина ва Колумбия терма жамоалари мухлислари томонидан юборилган. Бу эса чемпионат нафақат Шимолий Америка, балки Европа ва Жанубий Америка бозорларида ҳам юқори талабга эга эканини кўрсатади.
Чипталар савдосининг учинчи босқичида, яъни 11 декабрдан 13 январгача бўлган даврда, энг катта қизиқиш 27 июн куни Майами шаҳрида ўтказиладиган Колумбия – Португалия учрашувига тўғри келган. Шунингдек, 18 июндаги Мексика – Жанубий Корея баҳси, 19 июл куни Ню-Жерсида бўладиган финал ўйини ҳамда Мексика – Жанубий Африка ўртасидаги очилиш учрашуви чипталари ҳам тез сотиб олинган.
ФИФА президенти Жанни Инфантино турнир миқёси ва талаб даражаси жуда юқори эканини таъкидлаб, барча мухлислар стадионларга сиғмаслигини билдирди. Унинг айтишича, чемпионат давомида стадионлардан ташқари ҳудудларда ҳам мухлислар учун катта экранлар ўрнатилади.
Маълумот ўрнида, айрим тоифадаги чипталар нархи 8 680 долларгача етган. Бу ҳолат жамоатчилик танқидларига сабаб бўлгач, ФИФА 48 та федерация учун 60 долларлик махсус чипталар ажратилишини эълон қилган эди. Ушбу чипталар ўз терма жамоаси ўйинларига доимий қатнашиб келаётган энг содиқ мухлисларга тақдим этилиши режалаштирилган.
Эслатиб ўтамиз, қуръа натижаларига кўра, Ўзбекистон Португалия, Колумбия ҳамда қитъалараро плей-офф ғолиби (Конго – Ямайка/Янги Каледония) билан «К» гуруҳидан жой олди. Фабио Каннаваро бошчилигидаги жамоа илк турда Колумбияга қарши майдонга тушади. Бу учрашувга Мексика пойтахтидаги «Ацтека» стадиони мезбонлик қилади.
«Оқ бўрилар» иккинчи турда Криштиану Роналду бошчилигидаги Португалия билан ўйнайди. Мазкур беллашув АҚШдаги «NRG» стадионида ўтади.
Ўзбекистоннинг гуруҳ босқичидаги охирги ўйини эса Атлантадаги «Мерседес Бенц» стадионда ўтказилади.
