Аббосбек Файзуллаев ЖЧ-2026 биринчи турининг энг тезкор футболчиси бўлди

Ўзбекистон миллий жамоаси аъзоси Аббосбек Файзуллаев 2026 йилги Жаҳон чемпионатининг биринчи турида майдонга тушган футболчилар орасида энг юқори тезлик кўрсаткичини қайд этди.

SofaScore платформаси маълумотларига кўра, 22 ёшли футболчи Колумбияга қарши ўйин давомида соатига 36 километр тезликка чиққан. Бу эса биринчи тур баҳсларида иштирок этган барча футболчилар орасидаги энг яхши натижа бўлди.

Рейтингда иккинчи ўринни Хорватия терма жамоаси ҳимоячиси Йосип Станишич эгаллади. Унинг максимал тезлиги соатига 35,9 километрни ташкил этган. Кот-д’Ивуар вакили Вилфрид Синго эса 35,8 км/соат натижа билан учинчи поғонадан жой олди.

Файзуллаев чемпионатнинг илк турида яна бир неча тарихий натижаларга эришди. У Ўзбекистон миллий жамоасининг жаҳон чемпионатлари тарихидаги биринчи голи муаллифига айланди.

Шунингдек, Opta статистика платформаси маълумотига кўра, бўйи 167 сантиметр бўлган футболчи XXI асрдаги жаҳон чемпионатларида бош билан гол урган энг паст бўйли ўйинчи сифатида қайд этилди.

Бу борадаги аввалги рекорд Уругвай терма жамоаси футболчиси Жоржиан де Арраскаетага тегишли эди. Бўйи 173 сантиметр бўлган футболчи 2022 йилги жаҳон чемпионатида Гана дарвозасига бош билан гол урганди.