Аҳолига ажратилган газ баллонларини қиммат нархда сотмоқчи бўлган 39 нафар мутасадди аниқланди

Ўзбекистонда 19−21 октябрь кунлари ўтказилган рейдларда суюлтирилган газ баллонларининг ноқонуний айланмаси билан боғлиқ 120 дан ортиқ ҳолат аниқланди. Рейдлар ДХХ, Ички ишлар вазирлиги, Бош прокуратура, ФВВ ва Ўзэнергоинспекция томонидан ҳамкорликда ўтказилмоқда.

Аниқланишича, жами аҳоли учун газлаштирилмаган ҳудудларга ажратилган 13,6 тонна суюлтирилган газ солинган 3000 дан ортиқ баллон мусодара қилинган. 39 та ҳолатда газ хизмати ходимларининг алоқадор экани аниқланган.

Хусусан, Жиззах вилоятида 9 та ҳолатда 239 та баллон ноқонуний сақланган. Улардан бирида туман газ таъминоти бўлимида юқори лавозимда ишлаган эркак қариндошининг уйида 152 та баллонни сақлашда гумонланмоқда.

Сирдарё вилоятида Ховос тумани газ таъминоти бўлими мансабдор шахсининг уйидан 30 та баллон олиб қўйилган.

Самарқанд вилоятида Ургут тумани газ таъминоти бўлимига қарашли баллон тўлдириш шохобчаси қоровули 3 та тўлдирилган баллонни 2,5 миллион сўмга сотаётганда ушланган. Пастдарғом туманида яшовчининг уйидан эса 22 та тўлдирилган баллон топилган. Қайд этилишича, у уларни туман газ таъминоти бўлими ҳайдовчисидан 70 минг сўмдан сотиб олиб, 100 минг сўмдан қайта сотган.

Фарғона вилоятида Қўштепа тумани газ таъминоти бўлими муҳандиси ва чилангар кейинчалик сотиш учун уйларида 8 та баллонни ноқонуний сақлаган.

Сурхондарё вилоятидаги рейдлар давомида 65 та баллон олиб қўйилган. Ҳолатлардан бирида Бандихон туманида яшовчи 39 ёшли эркак қайта сотиш мақсадида туман газ таъминоти бўлими ҳайдовчисидан 32 та баллонни 70 минг сўмдан сотиб олган.

Навоий вилоятида Хатирчи тумани газ таъминоти бўлими ҳайдовчисининг уйидан 26 та баллон топилган.

ДХХга кўра, шунга ўхшаш қоидабузарликлар Қорақалпоғистон, Хоразм, Наманган ва бошқа ҳудудларда ҳам аниқланган.

Газ баллонларининг ноқонуний айланмасига дуч келган аҳоли 1520 рақамига мурожаат қилишга чақирилди. Махфийлик кафолатланади.