«Apple» учун янги рақиб: «OpenAI» «iPhone» концепциясини қайта ёзмоқда
Сэм Алтман жамоаси смартфонни тубдан ўзгартирувчи СИ-қурилма устида ишламоқда.
© Иллустратив расм«OpenAI» узоқ вақт давомида смартфон бозорига чиқиш режасини рад этиб келган бўлса-да, янги маълумотлар компания стратегияси ўзгарганини кўрсатмоқда. Тиниқли таҳлилчи Мин-Чи Куо ҳисоботига кўра, «OpenAI» асосчиси Сэм Алтман компанияси «iPhone»га тўғридан тўғри рақобатчи бўладиган ўз қурилмаси устида иш бошлаган. Бу ҳақда «9to5Mac» хабар берди.
Техник ҳамкорлар ва ишлаб чиқариш занжири
«OpenAI» ўз маҳсулоти учун етказиб бериш занжирини шакллантирмоқда. Компания «MediaTek» ва «Qualcomm» билан нейрон тармоқлар иши учун мослаштирилган махсус чиплар ишлаб чиқиш бўйича музокаралар олиб бормоқда.
Қурилмани лойиҳалаш ва йиғиш бўйича ягона ҳамкор сифатида «Luxshare» танланиши кутилмоқда. Лойиҳа спецификацияларини якунлаш 2026-йил охири 2027-йил бошига режалаштирилган, оммавий ишлаб чиқариш ва чиқарилиш эса 2028-йилда бўлиши мумкин.
«Бошқача ўйлайдиган» смартфон
«OpenAI» қурилмасининг асосий фарқи унинг аппарат қисмида эмас, балки дастурий логикасида бўлади. Мин-Чи Куо маълумотига кўра, смартфон асосини сунъий интеллект агентлари ташкил этади, бу эса фойдаланувчи тажрибасини «iOS»дан тубдан фарқли қилади.
Бу фикрни билвосита Сэм Алтман ҳам тасдиқлаган. У «X»да шундай ёзган:
«Кўринадики, операцион тизимлар ва фойдаланувчи интерфейслар дизайнини жиддий қайта кўриб чиқиш вақти келди. Шунингдек, интернет учун ҳам инсонлар ва агентлар учун бирдек мос протокол бўлиши керак».
Жамоа ва ҳамкорлар
«OpenAI» аппарат қисми устида «Apple»нинг собиқ дизайнери Жони Ив билан ҳамкорлик қилмоқда. Смартфондан ташқари қуйидаги қурилмалар ҳам ишлаб чиқилмоқда:
— «ChatGPT» интеграция қилинган ва камерага эга ақлли колонка (HomePod аналоги)
— Ақлли кўзойнаклар
— Ақлли чироқ
Нима учун «OpenAI» қарорини ўзгартирди?
Аввал компания янги турдаги қурилмалар смартфонни «алмаштиради» деб ҳисоблаган, аммо амалиёт бошқача бўлиб чиқди. Масалан, «Aravind Srinivas» каби рақобатчилар ҳам «iPhone» СИ босими остида йўқолмай, аксинча янада муҳимлашяпти деб ҳисоблайди.
«OpenAI» эҳтимол шундай хулосага келган: СИ бозорини бошқариш учун одамлар 24/7 қўлида ушлаб юрадиган асосий қурилма – смартфонни назорат қилиш керак.
