АҚШ НАТОдаги 200 та штат бирлигини қисқартиради

АҚШ ҳукумати NATOнинг бир қатор муҳим қўмондонлик марказларида хизмат қилаётган америкалик ҳарбий ва фуқаролик ходимлари сонини қисқартиришни режалаштирмоқда. Бу ҳақда вазиятдан хабардор учта манбага таянилган ҳолда Reuters хабар берди. Қарор Европа давлатлари орасида Вашингтоннинг алянс олдидаги мажбуриятлари борасидаги ишончни янада заифлаштириши мумкин.

Қисқартиришлар қайси бўлинмаларга тегишли?

Маълумотларга кўра, режа АҚШ томонидан НАТОнинг ҳарбий ва разведка операцияларини режалаштирувчи тузилмаларидаги тахминан 200 та штат бирлигини қисқартиришни назарда тутади.

Буюк Британияда жойлашган НАТО Разведка бирлашмаси маркази;

Брюсселдаги Иттифоқчилар махсус операциялари кучлари қўмондонлиги;

Португалиядаги денгиз операцияларини назорат қилувчи СТРИКФОРНАТО тузилмаси;

Алянснинг бошқа бир қатор шунга ўхшаш бўлинмалари.

Айни пайтда ушбу тузилмаларда жами 400 нафарга яқин америкалик хизмат қилмоқда. Қисқартиришлар натижасида уларнинг сони деярли икки баробарга камаяди. Манбалар таъкидлашича, ҳарбийлар лавозимидан бўшатилмайди, балки хизмат муддати тугаган ходимлар ўрнига янги кадрлар тайинланмайди.

Қисқартиришнинг асосий сабаблари

Режанинг расмий сабаблари очиқланмаган. Бироқ у президент Доналд Трамп маъмуриятининг ҳарбий ресурсларни кўпроқ Ғарбий яримшарга йўналтириш сиёсатига мос келиши айтилмоқда. Бу қарор Европа ҳудудида жойлашган 80 минг нафарлик АҚШ ҳарбий контингенти фонида катта кўламли бўлиб кўринмаслиги мумкин, аммо у алянс тарихидаги энг мураккаб дипломатик даврга тўғри келмоқда.

Европадаги хавотирларнинг яна бир сабаби — Трампнинг Гренландия масаласида Дания билан муносабатларни кескинлаштирган баёнотларидир. Шунингдек, айрим Европа давлатларига нисбатан савдо божлари жорий этилиши ҳақидаги режалар ҳам Европа иттифоқи билан қарама-қаршиликни кучайтирмоқда.

НАТО вакиллари эса АҚШ ходимларининг алмашиниши одатий жараён эканини, Вашингтоннинг Европадаги ҳарбий иштироки ҳозирча юқори даражада қолaётганини билдирмоқда.