«АҚШ тарихидаги энг қудратли вице-президент» вафот этди
Сиёсий таҳлилчилар унинг таъсири жуда кучли эканини таъкидлаган — кўплаб масалаларда у президентдан кам бўлмаган нуфузга эга бўлган.
АҚШнинг собиқ витсе-президенти Дик Чейни 84 ёшида вафот этди. Бу ҳақда CNN хабар бермоқда.
Чейни АҚШнинг тўртта президенти маъмуриятида фаолият юритган. У 1989-1993 йилларда АҚШ мудофаа вазири лавозимини эгаллаган. 2001 йилдан 2009 йилгача кичик Жорж Буш маъмуриятида икки муддат давомида вице-президент бўлган.
Сиёсий таҳлилчилар Чейнининг таъсири жуда кучли эканлигини таъкидлаганлар — кўплаб масалаларда у президентдан кам бўлмаган нуфузга эга эди. «Washington Post» газетаси муаллифларининг фикрича, у мамлакат тарихидаги энг таъсирли вице-президент бўлган.
Шунингдек, CNN республикачи Чейнини «замонавий Американинг энг қудратли вице-президенти» ва АҚШнинг Ироққа бостириб киришида ҳал қилувчи рол ўйнаган «террорга қарши урушнинг бош меъмори» деб таърифлаган.
CNN ёзишича, ҳаётининг сўнгги йилларида Чейни, содиқ консерватор бўлиб қолган ҳолда, қўрқоқ ва республика тарихидаги энг катта таҳдид деб атаган Доналд Трампни қаттиқ танқид қилгани учун Республикачилар партиясидан четлатилган.
Ўнлаб йиллар давомида Чейни мунтазам равишда юрак-қон томир касалликларидан азият чеккан ва бир неча бор юрак хуружини бошдан кечирган. 2012 йилда собиқ вице-президентга юрак кўчириш операцияси ўтказилган.
