АҚШ Венесуэлага нисбатан санкцияларни юмшатиши мумкин

АҚШ молия вазири Скотт Бессентнинг маълум қилишича, Вашингтон Венесуэлага нисбатан жорий этилган санкцияларни қисман бекор қилиш масаласини муҳокама қилмоқда. «Reuters» агентлигига берган интервюсида у асосий эътибор нефт экспорти ва уни сотишдан тушган маблағларни иқтисодиётга қайтаришга қаратилганини таъкидлади.

Бессентнинг айтишича, келаси ҳафта у Халқаро валюта жамғармаси ва Жаҳон банки раҳбарияти билан учрашиб, Венесуэла билан ҳамкорликни қайта йўлга қўйиш имкониятларини муҳокама қилади. Шунингдек, у ХВЖда сақланаётган тахминан 5 млн долларлик валюта активлари мамлакат иқтисодиётини тиклашда қўлланилиши мумкинлигини билдирди.

«Биз сотиладиган нефтга нисбатан санкцияларни олиб ташлаяпмиз», — деди Бессент. Бироқ у айнан қайси чекловлар бекор қилиниши мумкинлигини аниқлаштирмаган. Reuters маълумотларига кўра, ҳозирда АҚШ Молия вазирлиги нефт сотувидан тушган ва асосан танкерларда сақланаётган маблағларни Венесуэлага қайтариш имконини берувчи ҳуқуқий ўзгаришларни ўрганмоқда.

Бу қадамлар Доналд Трамп маъмуриятининг Венесуэладаги вазиятни барқарорлаштириш ва Американинг нефт компанияларининг мамлакатга қайта кириб келиши учун шароит яратишга қаратилган кенгроқ стратегиясининг бир қисми сифатида баҳоланмоқда.

Reuters эслатишича, санкцияларни юмшатиш масаласи АҚШ махсус хизматлари Николас Мадурони Каракасда қўлга олиб, уни рафиқаси Силия Флорес билан бирга АҚШга олиб кетганидан бир ҳафта ўтиб кун тартибига чиққан. Уларга «наркотерроризм», қурол сақлаш ва наркотиклар контрабандаси бўйича айбловлар қўйилган.

Ҳозир АҚШ санкциялари халқаро банклар ва кредиторларга махсус лицензиясиз Венесуэла ҳукумати билан ишлашни тақиқлайди. Шу билан бирга, 9 январ куни Доналд Трамп Венесуэла нефтидан тушган даромадларни мусодара қилишни тақиқловчи фармонни имзолади. Унга кўра, бу маблағлар мамлакатда «тинчлик, фаровонлик ва барқарорлик»ни таъминлашга хизмат қилиши керак.