Бахшилло Хўжаев ТДЮУ ректори этиб тайинланди
Адлия вазирлиги қарори билан Тошкент давлат юридик университетига янги ректор тайинланди ва муассасада таълим, бошқарув ҳамда кадрлар сиёсатида бир қатор ўзгаришлар жорий этилди.
Адлия вазирлигига кўра, университетнинг илмий ишлар ва инновациялар бўйича проректори лавозимида фаолият юритиб келган Бахшилло Хўжаев Камолович ректор этиб тайинланди. Шу пайтга қадар Исломбек Рустамбеков ректор вазифасини бажариб келаётган эди.
1982 йилда Бухоро шаҳрида туғилган Бахшилло Хўжаев ҳуқуқшунос мутахассис бўлиб, 2-даражали адлия маслаҳатчиси саналади. У 2004 йилда Тошкент давлат юридик институтида бакалавр, 2006 йилда магистратура босқичини тамомлаган. 2018 йилда Япониянинг Нагоя университетида докторантурани якунлаган. 2022 йилдан бери ТДЮУда проректор сифатида илмий фаолиятни ривожлантириш ва инновацион лойиҳаларни амалга оширишга масъул бўлиб келган.
Аввал хабар қилинганидек, Тошкент давлат юридик университети Янги Тошкент шаҳрига кўчирилади. Университет учун замонавий, халқаро талабларга жавоб берадиган марказ қурилиши мақсадида янги ер участкалари ажратилиб, 2025–2028 йилларда қурилиш ишлари амалга оширилади. Амалдаги биноларда эса Ўзбекистон ҳуқуқи тарихи музейи, Низоларни ҳал этиш маркази, Рақамли ҳуқуқ маркази ва Рақамли суд экспертиза маркази ташкил этилиши режалаштирилган.
