«Бизнесга лицензиясиз кириш» режими жорий этилади
Қонунчилик палатаси депутатлари томонидан бизнесда лицензия ёки рухсат олиш тартибини соддалаштиришни кўзда тутувчи қонун қабул қилинди.
13 январ куни Қонунчилик палатасида бўлиб ўтган мажлисда давлат хизматларини кўрсатиш тизимини янада такомиллаштиришга қаратилган қонун лойиҳаси биринчи ўқишда кўриб чиқилди.
Қайд этилишича, мазкур қонун лойиҳасида давлат хизматларини кўрсатиш тизимини янада кенгайтириш, давлат органлари ва ташкилотларида манфаатлар тўқнашувининг олдини олиш назарда тутилмоқда.
Шунингдек, қонун лойиҳаси билан лицензия ёки рухсат этиш хусусиятига эга ҳужжатни олиш тартиби ҳам соддалаштирилиб, 3 ойгача ўтиш ва мослашиш даврини белгилайдиган «Бизнесга лицензиясиз кириш» махсус режимини жорий этиш назарда тутилмоқда.
Мажлисда маълум қилинишича, қонун лойиҳасида назарда тутилаётган нормалар аҳоли ва тадбиркорлик субектлари учун бизнесни бошлашда ортиқча тартиб-таомиллардан ўтиш жараёнларини бартараф этишга хизмат қилади.
Муҳокамалар сўнгида қонун лойиҳаси депутатлар томонидан биринчи ўқишда қабул қилинди.
Аввалроқ 2026 йил 1 июлдан кучга кириши режалаштирилган «Тадбиркорлик фаолиятининг асослари ва кафолатлари тўғрисида» янги қонун лойиҳаси муҳокамага қўйилгани ҳақида хабар бергандик.
Эслатиб ўтамиз, Шавкат Мирзиёев 2025 йил 14 ноябр куни Ўзбекистонда «Бизнесни 15 дақиқада бошлаш» тамойилини жорий этиш кўзда тутилган фармонни имзолаганди. Унга кўра, 2026 йилдан тадбиркорлар давлат рўйхатидан ўтиш ҳамда фаолиятини бошлаш учун барча хизматларни бир жойда тез ва содда усулда амалга ошира олади. Натижада бир ҳафта талаб этиладиган бу жараёнларнинг муддати 15 дақиқага қисқаради.
