Ботаника боғида велосипед ва самокатларда ҳаракатланиш тақиқланди
Таъкидланишича, ушбу чора боғда хавфсиз, тинч ва осуда пиёда сайр қилиш муҳитини яратиш мақсадида амалга оширилмоқда.
Эртага, 1-апрелдан Тошкент Ботаника боғи ҳудудида барча турдаги велосипед ва самокатлар ҳаракатланиши тақиқланди. Бу ҳақда боғ маъмурияти хабар берди.
«Сизнинг ва яқинларингизнинг хавфсизлиги биз учун ҳар доим устувор вазифадир. Сўнгги вақтларда боғ ҳудудида велосипед ва самокатларда ҳаракатланиш давомида фуқароларнинг йиқилиши ва турли даражадаги тан жароҳатлари олиши билан боғлиқ нохуш ҳолатлар тез-тез кузатилмоқда», - дейилади хабарда.
Қайд этилишича, боғ ҳудудида барча турдаги велосипед ва самокатлар ҳаракатланишининг тўхтатилиши кўплаб сўровлар ҳамда Илмий кенгашнинг қарорига асосан қабул қилинган.
«Ушбу чора барчамиз учун боғда хавфсиз, тинч ва осуда пиёда сайр қилиш муҳитини яратиш мақсадида амалга оширилмоқда. Табиат гўзаллигидан пиёда сайр қилиб, хотиржам баҳра олишингиз учун барча шароитлар сақлаб қолинади», - дейилади хабарда.
