Фармацевтика маҳсулотлари бўйича давлат харидлари янги модул орқали амалга оширилади
Ҳукумат қарори билан давлат хариди электрон тизими операторининг электрон тизимида «Farma.xarid.uz» модули яратилади. Давлат харидлари мажбурий равишда ушбу модул орқали амалга оширилади.
21 ноябрда Вазирлар Маҳкамасининг «Фармацевтика маҳсулотлари бўйича давлат харидларини амалга ошириш механизмларини янада такомиллаштириш чора-тадбирлари тўғрисида»ги 737-сонли қарори қабул қилинди.
Ушбу қарорга кўра, давлат хариди электрон тизими операторининг электрон тизимида «Farma.xarid.uz» модули яратилади. Давлат буюртмачилари томонидан дори воситалари ва тиббий жиҳозлар бўйича давлат харидларини мажбурий равишда ушбу модул орқали амалга ошириш тартиби жорий этилади.
2026 йил 1 июлдан қуйидагиларнинг давлат рўйхатидан ўтказилиши лозим бўлган фармацевтика маҳсулотлари билан дори воситалари ва тиббий жиҳозлар бўйича давлат харидларида иштирок этишига рухсат берилади:
дори воситалари бўйича «Зарур ишлаб чиқариш амалиёти (GMP)» сертификатига эга ишлаб чиқарувчилар;
тиббий жиҳозлар бўйича «ISO:13485» сертификатига эга ишлаб чиқарувчилар;
«Зарур дистрибьюторлик амалиёти (GDP)» сертификатига эга дори воситаларини улгуржи реализация қилувчи ташкилотлар (дистрибюторлар).
Шунингдек, 2026 йил 1 мартдан Андижон ва Наманганда рўйхатдан ўтган давлат буюртмачилари, 2026 йил 1 июлдан барча давлат буюртмачилари томонидан фармацевтика маҳсулотлари бўйича давлат харидлари мазкур модул орқали амалга оширилади.
Бундан ташқари, 2026 йил 1 январдан «Pharma.gov.uz» порталида давлат харидлари соҳасида фойдаланиладиган товарларнинг миллий классификаторидан фойдаланиб ҳамда харидлар ҳажмларини кўрсатган ҳолда, барча фармацевтика маҳсулотларининг реестри эълон қилиб борилади.
Эслатиб ўтамиз, 10 ноябр куни Тошкентда президент Шавкат Мирзиёев тиббиёт ва фармацевтика ходимлари билан учрашувда аҳоли даромадларининг катта қисмини дори-дармонга сарфлаётганини таъкидлаган эди.
