Гуржистонда Турк ҳарбий самолёти қулади: экипаж аъзолари ҳалок бўлди
Гуржистон–Озарбойжон чегараси яқинида Туркияга тегишли C-130 ҳарбий самолёти қулади. Самолёт бортида 20 нафар туркиялик ҳарбий хизматчи бўлган ва уларнинг барчаси воқеа жойида ҳалок бўлган.
11 ноябр куни Туркиянинг C-130 русумли ҳарбий транспорт самолёти Гуржистон–Озарбойжон чегараси ҳудудида ҳалокатга учради. Самолётда бўлган барча 20 киши ҳалок бўлган. Фалокат юз берган жойда қидирув-қутқарув ишлари Туркия ва Грузия ҳукуматлари ҳамкорлигида олиб борилмоқда. Бу ҳақда Туркия Миллий мудофаа вазирлиги маълумот берди. Кечаси аскарларнинг шахси аниқланиб, уларнинг оила аъзоларига хабар етказилган.
Маълум қилинишича, самолёт Озарбойжон билан чегарадан тахминан беш километр узоқликдаги Сигнахи муниципалитети ҳудудига қулаган. Самолёт Ганжа шаҳридан Туркияга қайтаётган бўлиб, Грузия ҳаво ҳудудига кирганидан бир неча дақиқа ўтгач радарлар билан алоқа узилган. Ҳеч қандай хавф сигнали берилмаган.
Туркия президенти Ражаб Таййип Эрдўған ҳодиса ҳақидаги хабарни эшитгач, Анқарадаги чиқиши вақтида нутқини тўхтатиб, ҳалок бўлганларни «шаҳидларимиз» деб атаган. У шаҳид бўлган ҳарбийларнинг оилаларига таъзия билдириб, уларнинг хотирасини ҳурмат билан йод этишни таъкидлади. Озарбойжон президенти Илҳом Алиев ҳам таъзия билдириб, «турк халқи билан ҳамдард эканлигини» айтган.
