Илк араб сармоядорлари Ўзбекистонга кириб келди: бу ҳали бошланиши
2025 йилда араб давлатларидан ҳақиқий стратегик сармоялар Ўзбекистонга кириб келди. Улар илк бор маҳаллий компанияларни сотиб олиб, энергетикадан то саноатгача бўлган йўналишларда назоратни қўлга олмоқда.
2025 йил Ўзбекистон учун янги босқични бошлади — араб давлатларидан келган йирик инвесторлар илк бор маҳаллий бизнесларда улуш сотиб олди. Илгаригидек меморандумлар эмас, балки ҳақиқий битимлар амалга ошди.
Биринчилардан бўлиб Global South Utilities «Yashil Energiya» компаниясида назоратни қўлга олди — бу мамлакат қуёш энергетикаси соҳасига тўғридан тўғри киришни англатади. Шу билан бирга, Mubadala ва TAQA Талимаржон иссиқлик электр станциясида шерикка айланди — классик энергетика йўналиши орқали кириш намунаси.
Энг қизиқ битим эса Riyadh Cables Group томонидан амалга оширилди: саудияликлар «Artikul Aziya Kabel» компаниясининг 51 фоиз улушини сотиб олиб, саноат соҳасига кирди. Бу фақат энергетика эмас, балки хусусий ишлаб чиқариш секторига ҳам қизиқиш ортаётганини кўрсатади.
Манбаларга кўра, ҳозирда камида учта араб компанияси Mobiuz мобил операторини сотиб олиш имкониятини ўрганмоқда.
Бу жараён нега айнан ҳозир амалга оширилмоқда? Экспертларнинг таъкидлашича, Буюк Британия ёки АҚШ корпорацияларидан фарқли ўлароқ, БАА ва Саудия Арабистони компаниялари давлат билан тез келиша оладиган, катта рақобат йўқ ва сиёсий хавф паст бўлган бозорларга киришни маъқул кўради.
Ўзбекистон эса, ўз навбатида, узоқ комплаенс жараёнларисиз, санкция хавфисиз сармоя кирита оладиган ҳамкорларга муҳтож. Шундай қилиб, ҳар икки томон «ўз одамини» топди.
Биринчи босқич фақат энергетикага оид бўлган бўлса, эндиликда саноат ва телекоммуникация соҳалари ҳам қўшилмоқда. «Artikul Aziya Kabel» ва «Mobiuz» мисоллари — бу жараён эндигина бошланаётганидан дарак.
