Кумуш нархи кескин пастлади: бозор совий бошладими?

Кумуш нархи рекорд даражалардан кейин қисқа вақт ичида 7 фоиздан ортиққа тушди. «Bloomberg» маълумотига кўра, пасайишга АҚШ президенти Доналд Трампнинг муҳим хомашё импортига янги божлар жорий этмасликка қарор қилгани сабаб бўлди. Инвесторлар учун бу қарор бозордаги хавф омилларини қисқартириб, қисқа муддатли фойдани қайд этишга туртки берди.

Оқ уй томонидан ўтказилган кўп ойлик таҳлил якунларига кўра, Трамп маъмурияти тўғридан тўғри тарифлар ўрнига импорт учун минимал нарх чегараларини жорий этиш имконини кўриб чиқмоқда. Бу ёндашув стратегик таъминот занжирларини «ишончли давлатлар» орқали ривожлантиришга қаратилган. «Bloomberg»нинг таъкидлашича, айнан бож жорий этилиши мумкинлиги ҳақидаги хавотирлар ўтган йилда АҚШ омборларида кумуш захираларини ушлаб туриб, нархларни сунъий равишда юқори сақлаб келган эди.

Қимматбаҳо металлар сегментидаги умумий кайфият олтинга ҳам таъсир қилди. «Reuters» хабарига кўра, олтин нархи қарийб 0,9 фоизга пасайди. Бунга инвесторларнинг рекордлардан кейин фойдани мустаҳкамлаши, шунингдек, Трампнинг Федерал захира тизими ва Эрон масаласида нисбатан сокин позиция эгаллагани сабаб бўлди. Президент ФЗТ раҳбари Жером Пауэллни ишдан олиш режаси йўқлигини ҳам очиқ айтди.

«TD Securities» стратеги Дэниел Галига кўра, янги ҳужжат Вашингтон келгусида «анча аниқ ва танлаб олинган қарорлар» қабул қилишини кўрсатади. Унинг фикрича, кенг қамровли тарифлар қимматбаҳо металлар савдосига тасодифан зарба бериши мумкин эди, ҳозир эса бу хавф сезиларли даражада камайди.

Шу билан бирга, «Oversea-Chinese Banking Group» стратеги Кристофер Вонг кумуш учун ўрта муддатли манзара ижобийлигича қолишини таъкидлайди. Таклиф танқислиги, саноатда, айниқса қуёш энергетикасида истеъмолнинг ўсиши ҳамда олтиндан талабнинг қисман кумушга кўчиши бу метални қўллаб-қувватламоқда. Аммо у қисқа муддатда кескин тебранишлар эҳтиёткорликни талаб қилишини ҳам эслатиб ўтди.