Лавров G20 саммитида қатнашмайди: у Путиннинг қаҳрига учраганми?
Россия ТИВ раҳбари Сергей Лавров РФ Хавфсизлик Кенгаши йиғилишида кўриниш бермади ва G20 саммитида делегацияга ҳам бошчилик қилмайди. Трамп билан Будапешт саммитини барбод қилгани учун у Путиннинг ғазабига дучор бўлгани айтилмоқда.
Россия ташқи ишлар вазири Сергей Лавров сўнгги ҳафталарда сиёсий саҳнада деярли кўриниш бермапти. The Moscow Times хабарига кўра, у президент Владимир Путиннинг қаҳрига учраган.
5 ноябр куни бўлиб ўтган Россия Хавфсизлик кенгаши мажлисида РФ ташқи ишлар вазири Сергей Лавров қатнашмади. Унда мамлакатда қайтадан ядровий синовларни бошлаш масаласи муҳокама қилинган. Кремлда унинг йиғилишдаги йўқлиги «келишилган ҳолда» деб изоҳланди.
Бундан ташқари, Қладимир Путин аввал G20 саммитида Лавровни делегация раҳбари сифатида белгилаб келган бўлса-да, ЖАРда ўтадиган навбатдаги саммитда Лавровнинг ўрнига президент маъмурияти раҳбарининг ўринбосари Максим Орешкин тайинланди.
The Moscow Times нашри манбаларига кўра, Лавровнинг Путин олдидаги обрўси Америка билан алоқалардаги узилиш туфайли тушган. 21 октябр куни у АҚШ давлат котиби Марко Рубио билан кескин суҳбат ўтказган. Суҳбатдан сўнг Рубио Трампга Путин билан учрашув «аҳамиятсиз» эканини айтган ва натижада Венгрия пойтахти Будапештда ўтказилиши лозим бўлган Трамп–Путин саммити бекор қилинган.
Шундан сўнг АҚШ «Роснефт» ва «Лукойл»га қарши кескин санкциялар жорий қилди. Бу қарор Россиянинг «тинчлик музокараларига қизиқиши йўқлиги» билан изоҳланди.
Лавров–Рубио қўнғироқлашуви Путин учун жуда қимматга тушгани ҳақида хабар берган эдик.
