LUKOILга қарашли АЁҚШ тармоғи банкрот бўлди
Финландиядаги автомобилларга ёқилғи қуйиш шохобчалари тармоғи банкротлик тўғрисида ариза топширди. Шохобчада ҳали ҳам бензин сотилмоқда, аммо дизел тугаган.
Россиянинг LUKOIL компаниясига қарашли Teboil бренди остида фаолият юритаётган Финландиядаги автомобилларга ёқилғи қуйиш шохобчалари тармоғи банкротлик тўғрисида ариза топширди. Бу ҳақда Yle телерадиокомпанияси хабар бермоқда.
АЁҚШга эгалик қилувчи Жороинен Этаппи компанияси Финландия жануби-шарқидаги Шимолий Саво минтақаси округ судига банкротлик тўғрисида ариза берди. Шохобчада ҳали ҳам бензин сотилмоқда, аммо дизел ёқилғиси энди мавжуд эмас.
Yle маълумотига кўра, 2021 йилда Teboil’нинг Финландиядаги айланмаси тахминан 990 минг еврони ташкил этган бўлса, 2024 йилга келиб у деярли чорак қисмга қисқариб, 756 минг еврогача тушди. Нашр таъкидлашича, компания 22 минг евро миқдорида зарар кўрган. Teboil 1934 йилда ташкил этилган ва 2005 йилда LUKOIL гуруҳининг таркибига кирган.
Яқинда АҚШ Молия вазирлиги Американинг янги санкциялар пакетига LUKOIL ва унинг шўба тузилмаларини киритди. Қўшма Штатлар LUKOIL ва унинг 50 фоизи ва ундан кўп улушга эга бўлган шўба корхоналари билан операцияларни якунлаш учун бир ой муҳлат берди. Шундан сўнг, LUKOIL чеклов чоралари жорий этилиши муносабати билан ўзининг халқаро активларини сотиш ниятида эканлигини маълум қилди.
30 октябр куни LUKOIL Gunvor group халқаро нефт трейдинг компаниясидан Россия компаниясининг хорижий активларига эгалик қилувчи LUKOIL International GmbH компаниясини сотиб олиш бўйича таклиф олганини эълон қилди. Таъкидлаш жоизки, Швецариянинг Gunvor Group хомашё трейдерига россиялик олигарх Геннадий Тимченко ва унинг швециялик ҳамкори Торберн Тернквист асос солган.
Бироқ, 7 ноябр куни Gunvor ўз таклифини қайтариб олишини маълум қилди. Компания ушбу баёнотни АҚШ Молия вазирлиги унинг Россия билан алоқалари ҳақида хабар берганидан ва Россия-Украина уруши давом этаётган бир пайтда Gunvor бизнес юритиш учун лицензия олмаслиги тўғрисида огоҳлантирганидан сўнг берди.
LUKOIL 11 мамлакатда, жумладан, Болгария, Руминия ва Нидерландиядаги нефтни қайта ишлаш заводлари, Европадаги АЁҚШ тармоғи, Озарбойжон, Қозоғистон, Ўзбекистон, Ироқ, Миср, БАА, шунингдек, Африка ва Лотин Америкаси мамлакатларидаги нефт қазиб олиш лойиҳалари каби активларга эгалик қилади.
