Мадуро жони омон қолиши эвазига истеъфони муҳокама қилмоқда — The Atlantic
Расмий Вашингтон Венесуэла президенти Николас Мадуро истеъфоси эвазига хавфсизлик кафолатлари бериш имкониятини муҳокама қилмоқда. Бу сиёсий ўтишни назоратли қилиш мақсадида амалга оширилмоқда.
The Atlantic нашрининг ўз манбаларига таяниб ёзишича, АҚШ Венесуэла президенти Николас Мадуро билан унинг назоратли истеъфоси юзасидан музокаралар олиб бормоқда. Бу шартнома доирасида Мадурога шахсий хавфсизлик кафолатлари, амнистия, ушланган америкаликларни озод қилиш, унга қарши мукофотларни бекор қилиш ва учинчи мамлакатда қабул қилиниш шароитлари таклиф этилиши мумкин.
Манбаларнинг таъкидлашича, Мадуро мамлакатни тарк этишга тайёрлигини билдирган, агар Вашингтон уни «диктатор» ёки «наркобарон» сифатида аташни тўхтатса. Айрим расмийларнинг сўзларига кўра, у билан барча масалалар юзасидан келишувга эришиш мумкин. Бундай сценарий тарафдорлари уни потенциал қонли тўқнашувларнинг олдини олиш имконияти сифатида баҳоламоқда.
Шу билан бирга, АҚШ президенти Доналд Трамп дипломатик босим билан биргаликда ҳарбий куч таҳдидини ҳам сақлаб қолмоқда. АҚШ Венесуэла яқинида 1962 йилдан буён энг йирик ҳарбий гуруҳни жойлаштирди: Gerald R. Ford авианосецидан ташқари 8 та ҳарбий кема, 10 минг аскар, қирувчи учоқлар ва атом сув ости кемаси жалб қилинган.
Музокараларда АҚШнинг махсус вакили Ричард Гренелл фаол иштирок этмоқда — у Каракас билан тўғридан тўғри алоқаларни қайта тиклади ва қатор америкаликларни озод қилинишига ёрдам берди. Шу билан бирга, давлат котиби Марко Рубио Мадурони наркокартеллар ва ноқонуний миграция орқали АҚШ учун таҳдид деб атаб, қаттиқроқ чораларни талаб қилмоқда.
Айни пайтда, MAGA ҳаракати ичида интервенция ғоясига қарши кайфият кучаймоқда. Уларнинг фикрича, Венесуэлага бостириб кириш «America First» принципига зид ва бошқа мамлакат ишларига аралашиш ҳисобланади.
