Mobiuz хусусийлаштирилишида инвесторларга қўшимча муддат берилди
Алоқа операторини хусусийлаштириш жараёнида қатнашаётган учта инвесторга ўз таклифларини яхшилаш учун 21 апрелгача қўшимча муддат берилди.
Ўзбекистонда «Universal Mobile Systems» МЧЖ (Mobiuz)ни хусусийлаштириш жараёни якуний босқичга кирди. Давлат активларини бошқариш агентлиги маълум қилишича, инвесторларга ўз таклифларини янада такомиллаштириш учун қўшимча муддат берилди.
Аввалроқ саралаб олинган уч нафар инвестор энди 2026 йил 21 апрелга қадар ўз таклифларини яхшилаб тақдим этиши мумкин. Шунингдек, мажбурий таклифларни топширишнинг охирги муддати 20 апрел соат 23:59гача этиб белгиланди.
Саралаш жараёни
Mobiuz'ни 100 фоиз давлат улуши билан хусусийлаштириш жараёни 2025 йил июн ойида бошланган эди. Дастлаб 15 та маҳаллий ва халқаро инвестор ушбу активга қизиқиш билдирган.
Кейинчалик 10 та мажбурий бўлмаган таклиф қабул қилинган ва маслаҳатчилар тавсияси асосида 7 та иштирокчи якуний босқичга ўтказилган. Улардан 6 таси мажбурий таклифларини тақдим этган.
Таҳлил натижасида энг юқори нарх ва рақобатбардош шартларни таклиф этган 3 та инвестор танлаб олинган.
Нега муддат узайтирилди?
Агентликка кўра, хусусийлаштиришдан максимал иқтисодий самара олиш мақсадида савдо жараёнининг айрим шартлари такомиллаштирилмоқда. Шу боис инвесторларга ўз таклифларини қайта кўриб чиқиш ва яхшилаш имконияти берилган.
Жараён доирасида халқаро маслаҳатчилар — KPMG ва Rothschild & Co компаниялари иштирок этмоқда. Улар инвесторларга барча техник ва ташкилий маълумотларни тақдим этяпти.
Давлат активларини бошқариш агентлиги хусусийлаштириш жараёни шаффоф ва рақобат асосида ўтказилишини таъкидламоқда. Барча иштирокчилар ва жамоатчилик мунтазам равишда хабардор қилиб борилади.
Маълумот учун: Mobiuz 2025-йилда қарийб 175 млрд сўм фойда олган эди. Компания фойдаси 2024-йилга нисбатан 39 баробар ўсган.
Эслатиб ўтамиз, аввалроқ Ўзбекистон ҳукумати компанияни тахминан 300 миллион долларга сотиш режалаштиргани ҳақида хабар берган эдик.
