Neft narxlari AQSH va Eron muzokaralari kutilayotgani fonida pasaydi
Investorlar Yaqin Sharqdagi geosiyosiy vaziyatning yumshashi ehtimoliga javob bermoqda.
© Reuters21-aprel kuni neft narxlari tushdi va amalda kechagi keskin o‘sishni yo‘qqa chiqardi. Bozor ishtirokchilari AQSH va Eron o‘rtasida muzokaralar shu hafta bo‘lib o‘tishi mumkinligi haqidagi kutilmalarga javob bermoqda. Bu esa Yaqin Sharq kabi muhim hududdan yoqilg‘i ta’minoti tiklanishi ehtimolini kuchaytirishi mumkin, deb xabar beradi «Reuters».
Narxlar dinamikasi
21-aprel soat 09:00 holatiga ko‘ra, «Brent» markali neft fyucherslari 1,04 dollarga (1,1 foiz) arzonlashib, barreli 94,44 dollarga tushdi. AQSHning «WTI» (West Texas Intermediate) nefti may oyi yetkazib berish bo‘yicha 1,66 dollarga (1,9 foiz) pasayib, 87,95 dollardan savdolandi. May oyi kontrakti bugun, 21-aprel kuni tugaydi, iyun oyiga mo‘ljallangan faolroq kontrakt esa 1,24 dollarga (1,4 foiz) tushib, 86,18 dollarga yetdi.
Bu pasayish kechagi keskin o‘sishdan so‘ng yuz berdi: o‘shanda «Brent» 5,6 foizga, «WTI» esa 6,9 foizga qimmatlashgan edi. Bunga Eron tomonidan Ho‘rmuz bo‘g‘ozining yana yopilishi va AQSH tomonidan eronlik yuk kemasining qo‘lga olinishi sabab bo‘lgan.
Pokistondagi muzokaralar
Investorlar asosan o‘t ochishni to‘xtatish rejimini uzaytirish yoki yakuniy kelishuv imzolanishi ehtimoliga e’tibor qaratmoqda. «Reuters» manbalariga ko‘ra, Eron Pokistonda o‘tkazilishi mumkin bo‘lgan tinchlik muzokaralarida ishtirok etish masalasini ko‘rib chiqmoqda. Pokiston bu jarayonda AQSHning Eron portlariga qo‘ygan blokadasini yumshatishga qaratilgan vositachi sifatida ishtirok etmoqda.
Biroq vaziyat hali ham noaniqligicha qolmoqda:
Tehron rasmiylari muzokaralarda ishtirok etish bo‘yicha yakuniy qaror hali qabul qilinmaganini bildirmoqda;
AQSH tomonidan o‘t ochishni to‘xtatish rejimining doimiy buzilishi muloqotga to‘sqinlik qilayotgani aytilmoqda;
Eron parlamenti spikeri Muhammad-Boqir G‘olibaf mamlakat tahdidlar bosimi ostida muzokara olib bormasligini ta’kidladi.
Iqtisodiy oqibatlar va xavflar
Ho‘rmuz bo‘g‘ozi orqali jahon neft eksportining taxminan beshdan biri o‘tadi va uning blokada qilinishi allaqachon ta’sirini ko‘rsata boshladi. Kuvayt neft yetkazib berish bo‘yicha fors-major e’lon qildi – bunga xavfsiz tranzitning ta’minlanmagani sabab bo‘ldi.
«Citigroup» (Citi) tahlilchilari ogohlantirishicha, agar blokada yana bir oy davom etsa, 2026-yil ikkinchi choragida neft narxlari 110 dollargacha ko‘tarilishi mumkin.
«Société Générale» esa yuqori narxlar tufayli jahon bo‘ylab neftga bo‘lgan talab allaqachon 3 foizga qisqarganini qayd etmoqda.
