Ўзбекистон пахтаси халқаро текширувдан ўтади: BCI билан келишув тасдиқланди
Ўзбекистон Better Cotton Initiative билан келишув имзолади. Унга кўра, мамлакатда пахта етиштириш, қайта ишлаш ва экспорт занжири халқаро стандартлар асосида баҳоланиб, сертификатлаштирилади.
Ўзбекистонда пахта етиштириш ва унинг таъминот занжири халқаро мониторинг ва сертификатлаштириш тизимига босқичма-босқич ўтказилади. Бу Better Cotton Initiative (BCI) билан имзоланган келишув орқали амалга оширилади. Ташаббус пахта кластерларининг экологик ва меҳнат стандартларига риоя қилиши, маҳсулот манбасини аниқ трассировка қилиш ва халқаро брендлар талабларига мос ҳужжатлаштиришни назарда тутади.
Келишув халқаро бозорларга чиқиш учун муҳим омил сифатида баҳоланмоқда. Жаҳон миқёсида йирик кийим ва текстил ишлаб чиқарувчи компаниялар BCI, Fairtrade ёки Better Work каби сертификатлашган таъминот занжирларига устуворлик бермоқда. Бу, айниқса, АҚШ ва Европа бозорларида болалар меҳнати, мажбурий меҳнат ва экологик хавфлар бўйича аудит талаблари кучайган бир пайтда долзарбдир.
Ўзбекистонда сўнгги йилларда пахта соҳасида мажбурий меҳнатга оид халқаро кузатувлар бекор қилинган бўлса-да, кластер тизимидаги иқтисодий муносабатлар, сув сарфи ва деҳқонлар даромадига оид масалалар очиқ қолмоқда. BCI тизимига қўшилиш шу йўналишларда аниқ индикаторлар орқали мониторинг ўтказишни талаб қилади, аммо бу механизмларнинг амалда қай даражада жорий этилиши ҳозирча маълум эмас.
Ҳужжат маҳсулотни қайта ишлашдан экспортгача бўлган занжирда рақамли ҳисобот ва трассировка механизмларини жорий этишни ҳам ўз ичига олади. Бу маҳаллий ишлаб чиқарувчилар учун қўшимча харажатлар талаб қилиши мумкин, бироқ уларга юқори қийматли экспорт сегментларига кириш имконини бериши ҳам қайд этилмоқда.
