Ўзбекистон–Қозоғистон темирйўл юк ҳажми 60 млн тоннагача ошади

Ўзбекистон ва Қозоғистон темирйўл орқали юк ташиш ҳажмини 60 миллион тоннагача етказишни режалаштирмоқда. Бу масала 16 феврал куни икки мамлакат транспорт вазирлари учрашувида муҳокама қилинди.

2025 йил якунларига кўра, ўзаро темирйўл ташувлари 32,3 миллион тоннани ташкил этди. Бу 2024 йилга нисбатан 16 фоизга кўп. Юк оқимини янада ошириш мақсадида Сариағаш, Оазис ва Сирдарё туташув пунктларида инфратузилмани ривожлантириш, шунингдек Дарбоза—Мақтаарал участкаси қурилишини якунлаш бўйича қўшма режа ишлаб чиқилган.

Ҳозирда Сариағаш орқали кунига 36 жуфт поезд ҳаракатланмоқда. Бу кўрсаткични 40 жуфтгача ошириш режалаштирилган. Оазис орқали 2 жуфт поезд қатнамоқда, Дарбоза—Мақтаарал участкаси ишга тушгач, бу рақам 10 жуфтгача етади. Сирдарё орқали эса 10 жуфт поезд ўтказиш кўзда тутилган.

19 феврал куни «Ўзбекистон темирйўллари» акциядорлик жамияти делегацияси Қозоғистонга хизмат сафари билан бориб, «Қозоғистон темирйўллари» билан ҳамкорликни кенгайтириш масалаларини муҳокама қилди.

Учрашувларда Сариағаш станциясида юк айланмасини ошириш, поездларни қабул қилиш ва жўнатиш жараёнларини такомиллаштириш, чегара ҳудудларида ўтказувчанлик қувватини кенгайтириш ҳамда ҳужжат айланишини рақамлаштириш самарадорлигини ошириш масалалари кўриб чиқилди.

Шунингдек, делегация Сирдарё ва Мақтаарал станцияларида бўлиб, Сирдарё–Мақтаарал участкасида юк айланмасини кўпайтириш ва рақамли ҳужжат айланишини жорий этиш бўйича амалий музокаралар ўтказди.

Томонлар ушбу чоралар стратегик ҳамкорликни мустаҳкамлаш ва минтақанинг транзит салоҳиятини оширишга хизмат қилишини таъкидлади.