Ўзбекистонда аҳоли кредитлари бизнесникига нисбатан тезроқ ўсмоқда
Марказий банк 2026 йилнинг 1 июн ҳолатига кўра банк тизимидаги кредитлар таркибини эълон қилди. Банклар кредит портфелида энг катта улуш корпоратив кредитларга тўғри келаётган бўлса, аҳоли орасида ипотека ва кредит карталарига талаб юқорилигича қолмоқда.
Марказий банк 2026 йил 1 июнь ҳолатига кредитлар таркибини эълон қилди. Унга кўра йил ярмига келиб банк тизимининг жами кредит қолдиғи 636 трлн сўмни ташкил этиб, йил бошига нисбатан 5,3 фоизга, ўтган йилга нисбатан эса 12 фоизга ошди.
Жисмоний шахсларга ажратилган кредитлар
Бунда жисмоний шахсларга ажратилган кредитлар ҳажми 232,9 трлн сўмга етди. Бу эса йил бошига нисбатан 5,7 фоиз ўсиш бўлганини кўрсатади. Аҳоли кредитлари таркибида энг юқори улуш ипотека кредитларига тўғри келади. Бугунги кунда бу турдаги кредитларнинг ҳажми 85,2 трлн сўмни ташкил қилмоқда.
Шунингдек, микрокредитлар ҳажми 44,9 трлн сўмга етиб, 11 фоизга ошган бўлса, микроқарзлар ҳажми 50,2 трлн сўмни ташкил этиб, 2,6 фоизга кўпайди. Бу кичик молиялаштириш инструментларига талаб ҳали ҳам юқори эканлигини кўрсатади.
Кредит карталари ва овердрафтлар йўналиши 24,3 фоизга кенгайди. Жисмоний шахслар кредитлари орасидаги энг катта ўсиш айнан шу сегментда кузатилди. Бу аҳолининг қисқа муддатли ликвидлик воситаларига эҳтиёжи ортаётганидан далолат беради.
Юридик шахсларга ажратилган кредитлар
Шу билан бирга, юридик шахсларга ажратилган кредитлар ҳажми 403,1 трлн сўмга етиб, йил бошига нисбатан 5,1 фоизга ошди. Бу борада корпоратив кредитлаш тизими банклар томонидан бериладиган кредитларнинг асосий қисмини шакллантирмоқда.
Шунингдек, лизинг ва факторинг операциялари 19,7 фоизга, банклараро кредитлар эса 43,2 фоизга ошгани бизнес субъектлари учун молиялаштириш имкониятлари кенгайиб бораётганини кўрсатмоқда.
Кредит портфелининг таркибий таҳлили банк тизимида ҳам аҳоли, ҳам бизнес сегментлари бўйича молиялаштириш фаоллиги сақланиб қолаётганини, айниқса уй-жой, кичик бизнес ва қисқа муддатли ликвидлик инструментларига талаб юқори эканини кўрсатмоқда.
Кредитларнинг соҳалардаги улуши
Юридик шахсларга берилган кредитларнинг катта қисмини саноат соҳаси улушига тўғри келади. Бугунга келиб 139,5 трлн сўм миқдоридаги маблағ айнан шу соҳага йўналтирилган. Таққослаш учун 2025 йилнинг мос даврида бу кўрсаткич 156,8 трлн сўмни ташкил қилган эди.
Шунингдек, қишлоқ хўжалиги учун 67,2 трлн сўм, савдо ва умумий хизматлар учун 53,2 трлн сўм, транспорт ва коммуникациялар учун 34,4 трлн сўм, қурилиш соҳасига 21,6 трлн сўм миқдорида кредитлар ажратилган.
