Ўзбекистонда илк исломий микромолия банки пайдо бўлиши мумкин — Apex Moliya
Компания Марказий банкдан дастлабки рухсат олгач, устав капиталини 50 млрд сўмга етказишни режалаштирмоқда. Жараён якунланса, у Ўзбекистондаги илк исломий микромолия банкига айланиши мумкин.
Apex Moliya акциядорлари ташкилот фаолиятини тўлиқ исломий банк тамойиллари асосида ишлайдиган микромолия банкига ўзгартиришни маъқуллади.
Агар Марказий банк тегишли рухсат ва лицензия берса, у Ўзбекистондаги илк исломий микромолия банкига айланиши мумкин.
Қарор акциядорларнинг 14-июлдаги навбатдан ташқари умумий йиғилишида бир овоздан маъқулланган.
Йиғилишда бўлажак банкнинг устави, бизнес-режаси ва ташкилий тузилмаси тасдиқланиб, кузатув кенгаши, беш кишилик бошқарув ҳамда исломий молия кенгаши таркиби шакллантирилган.
Исломий молия кенгашига Қирғизистондаги «Alhamd Eurasia Sharia Advisory Services» компанияси директори Акжигит Кокоев раис этиб белгиланган. Кенгаш таркибига Ўзбекистон мусулмонлари идорасининг икки мутахассиси ҳам киритилган.
Энди Apex Moliya Марказий банкдан дастлабки рухсат олиши керак. Рухсат берилгач, ташкилот устав капиталини қўшимча акциялар чиқариш ҳисобига 50 млрд сўмга етказишни режалаштирган.
Apex Moliya айни пайтда Ўзбекистондаги исломий микромолиялаштириш бозорининг энг йирик иштирокчиси ҳисобланади.
Ташкилот 2026-йилнинг биринчи чорагида 8,4 млрд сўмлик хизмат кўрсатган. Бу бозордаги жами 11,2 млрд сўмлик исломий молиялаштириш ҳажмининг тўртдан уч қисмига тенг.
