Ўзбекистонда кўмир, нефт ва газ қазиб олиш кескин камайди
Ўзбекистонда 2026 йилнинг биринчи чорагида нефт, газ ва кўмир қазиб олиш ҳажми пасайди, бензин, электр энергияси, дизел ёқилғиси ва портландцемент ишлаб чиқаришида эса ўсиш кузатилди.
© RIA Novosti2026 йил январ–март ойларида Ўзбекистонда асосий энергетика ресурслари қазиб олиш ҳажми сезиларли қисқарди. Миллий статистика қўмитаси маълумотларига кўра, табиий газ қазиб чиқариш 9,6 млрд куб метрни ташкил этиб, ўтган йилнинг шу даврига нисбатан 15 фоизга камайган.
Шу даврда 157,3 минг тонна нефт қазиб олинган бўлиб, бу 2025 йил биринчи чорагига нисбатан 2,2 фоизга пастдир. Газ конденсати ишлаб чиқариш ҳажми эса 18,3 фоизга қисқариб, 242,3 минг тонна бўлди.
Икки йиллик таққослаш
2024 йил билан таққослаганда пасайиш янада юқори бўлган. Хусусан, икки йил ичида газ қазиб олиш 17,2 фоизга, нефт 12,2 фоизга, газ конденсати эса 26 фоизга камайган.
Автомобил бензини ишлаб чиқариш 2,9 фоизга ошиб, 313,2 минг тоннага етди. Бироқ бу кўрсаткич 2024 йил даражасидан ҳали ҳам 13,1 фоизга паст бўлиб қолмоқда.
Кўмир қазиб олиш 1,1 млн тоннагача қисқарди — бу ўтган йилга (1,2 млн тонна) нисбатан 8,3 фоизга кам. Шу билан бирга, жорий кўрсаткич худди шу даврда 1 млн тонна қазиб олинган 2024-йил даражасидан ҳам юқори.
Ижобий динамика
Портландцемент ва дизел ёқилғиси ишлаб чиқаришда ижобий динамика сақланиб қолмоқда. Портландцемент ишлаб чиқариш йил давомида 13,9 фоизга ошиб, 3,6 млн тоннадан 4,1 млн тоннага етди.
Дизел ёқилғиси ишлаб чиқариш 54,3 фоизга — 2025-йилдаги 182 минг тоннадан 280,9 минг тоннагача кескин ўсди. Таққослаш учун: 2024-йилда дизел ишлаб чиқариш ҳажми 211,8 минг тоннани ташкил этган.
Электр энергияси ишлаб чиқариш эса 4,7 фоизга ошиб, 22,93 млрд kW/hга етди. Асосий ўсиш кичик тадбиркорлик субъектлари ҳисобига таъминланган.
