Ўзбекистоннинг 2 та кони дунёдаги энг кўп олтин қазиб чиқарувчилар бешталигига кирди
2024 йилда Навоий ва Олмалиқ кон-металлургия комбинатлари дунёдаги энг кўп олтин ишлаб чиқарган бешта кон орасидан жой олди.
Mining.com нашри 2024 йилда дунёда энг кўп олтин ишлаб чиқарган конлар рўйхатини эълон. Рейтингнинг биринчи бешлигида АҚШ, Ўзбекистон, Индонезия ва Россияда жойлашган конлар жой олган. Улар орасида Ўзбекистоннинг икки йирик саноат гиганти — НКМК ва ОКМК ҳам мавжуд.
Нашр маълумотларига кўра, биринчи ўринни АҚШдаги Невада кони эгаллади. У 2024 йил давомида 83,9 тонна олтин ишлаб чиқарган. Иккинчи ўринда Ўзбекистоннинг Навоий кон-металлургия комбинати (НКМК) қайд этилган бўлиб, у 83,25 тонна олтин ишлаб чиқарган. Комбинатнинг ўз маълумотларига кўра эса бу кўрсаткич 96,4 тоннани ташкил этган.
Учинчи ўринни Индонезиядаги Грасберг кони 57,85 тонна кўрсаткич билан эгаллади. Кейинги поғоналарда Россиянинг Олимпиада кони (44,83 тонна) ва Ўзбекистоннинг Олмалиқ кон-металлургия комбинати (ОКМК) (34,66 тонна) жой олди.
Маълумот учун, ОКМК нафақат олтин, балки мис ишлаб чиқариш бўйича ҳам Марказий Осиёда етакчи ҳисобланади. Нашрнинг таъкидлашича, комбинат 2030 йилгача тозаланган мис ишлаб чиқариш ҳажмини 400 минг тоннадан оширишни режалаштирган.
Эслатиб ўтамиз, аввалроқ Ўзбекистон жорий йилнинг сентябр ойида дунёдаги ягона олтин сотувчиси бўлгани ҳақида хабар берган эдик.
