Ўзбекистоннинг Марказий Осиё давлатлари билан савдоси 2,1 млрд долларга етди

2026 йил январь–март ойларида Ўзбекистоннинг Марказий Осиё давлатлари билан ташқи савдо айланмаси 2,1 млрд долларга етди. Бу ўтган йилнинг шу даврига нисбатан 38 фоизга кўп бўлиб, мамлакат умумий ташқи савдосининг 11,5 фоизини ташкил этган.

Иқтисодий тадқиқотлар ва ислоҳотлар маркази тайёрлаган ҳисоботга кўра, экспорт ҳажми 638,1 млн долларга етиб, 19 фоизга ошган. Импорт эса анча юқори суръатларда ўсиб, 1,4 млрд долларга (+48,5 фоиз) етган. Бу эса ташқи савдода импорт устунлигини сақлаб қолмоқда.

Мамлакатлар кесимида

Ўзбекистоннинг Марказий Осиёдаги асосий савдо ҳамкори Қозоғистон бўлиб қолмоқда. Ушбу давлат билан савдо айланмаси 1,3 млрд долларга етган ва умумий ҳажмнинг 63 фоизини ташкил этган. Шундан 282,8 млн доллар экспорт, 1 млрд доллар эса импорт ҳиссасига тўғри келади.

Туркманистон билан савдо айланмаси 357,5 млн долларга етган бўлиб, ўсиш суръати энг юқори — 97,9 фоизни ташкил этган. Экспорт 44,7 млн доллар, импорт эса 312,8 млн доллар бўлган.

Қирғизистон билан товар айирбошлаш 221,7 млн долларга етиб, 43,4 фоизга ошган. Бу йўналишда экспорт 169,9 млн доллар, импорт эса 51,8 млн долларга тенг.

Тожикистон билан савдо айланмаси 188,8 млн долларни ташкил этган ва 32,3 фоизга ўсган. Экспорт 140,8 млн доллар, импорт эса 48 млн доллар бўлган.

Улуш ва тенденциялар

Марказий Осиё давлатлари орасида савдодаги энг катта улуш Қозоғистон ҳиссасига тўғри келмоқда — 63 фоиз. Қолган улушлар Туркманистон (17 фоиз), Қирғизистон (11 фоиз) ва Тожикистон (9 фоиз) ўртасида тақсимланган.

Минтақа билан савдо алоқаларида ижобий динамика кузатилмоқда. Айниқса, импорт ҳажмининг юқори суръатларда ўсиши ва айрим давлатлар билан савдо фаоллигининг кучайиши иқтисодий интеграция жараёнлари жадаллашаётганини кўрсатади.

Эслатиб ўтамиз, 2026 йил январь-март ойларида Ўзбекистоннинг ташқи савдо айланмаси 18 млрд АҚШ долларига етган ва 2025 йилнинг мос даврига нисбатан 471 млн АҚШ долларига ёки 2,7  фоизга кўпайган.