Паркентдан Тошкентга электропоезд қатнови йўлга қўйилди

Паркент–Тошкент–Паркент йўналишида шаҳарлараро электропоезд қатнови 7-сентябрдан йўлга қўйилди. Бу ҳақда «Ўзбекистон темир йўллари» АЖ матбуот хизмати хабар берди.

Электропоезд 586 та ўриндиққа эга бўлиб, жами 1154 нафаргача йўловчини ташиш имконияти мавжуд. Паркентдан Тошкентгача бўлган йўлни поезд тахминан 50 дақиқада босиб ўтади.

Йўл ҳақи катталар учун 10 минг сўмгача, 10 ёшгача бўлган болалар учун эса 6,5 минг сўм этиб белгиланган.

Янги темир йўл

Байтқўрғон–Паркент темир йўл линиясини қуриш ишлари президентнинг 2025-йил 27-январдаги қарори асосида 2025-йил январда бошланган.

Лойиҳа доирасида узунлиги 24 километр бўлган электрлаштирилган темир йўл барпо этилди. Шунингдек, 3 та темир-бетон кўприк ва 1 та автомобиль йўл ўтказгичи қурилди.

Инфратузилма таркибида 76 та сув ўтказиш иншооти, 16 та автомобиль ва темир йўл кесишмаси ҳамда 50 ўринли «Паркент» темир йўл бекати ташкил этилди.

«Ўзбекистон темир йўллари»нинг таъкидлашича, лойиҳанинг ишга туширилиши Паркент туманининг сайёҳлик салоҳиятини оширишга хизмат қилиши мумкин.

Янги темир йўл нафақат маҳаллий аҳоли учун пойтахтга бориш-келишни енгиллаштиради, балки ҳудудга сайёҳлар оқимини кўпайтириш учун ҳам қўшимча имконият яратади.