«Qamchi prezident bo‘lardi, men esa dam olishga ketardim» — Japarov Tashiyev ishi haqida gapirdi
U Tashiyevga xalqni shimol va janubga bo‘ladiganlarni qattiq jazolashi va uni lavozimdan olishini aytganini esladi. Prezident hatto do‘stiga agar saylovda qatnashsa, buning uchun unga barcha sharoitlarni yaratib berishini ham bildirgan.
© 24.kgQirg‘iziston prezidenti Sadir Japarov yangi intervyusida mamlakatning Milliy xavfsizlik davlat qo‘mitasi sobiq rahbari Qamchibek Tashiyevni kelajakdagi davlat rahbari sifatida ko‘rib chiqqanini aytdi. Bu haqda u «Kaktus.media» nashriga bergan intervyusida so‘z ochdi.
«Qamchi prezident bo‘lardi»
Japarov 2027-yilgi prezidentlik saylovlarida qatnashishdan voz kechib, Tashiyevni qo‘llab-quvvatlamoqchi bo‘lgan. Uning so‘zlariga ko‘ra, u prezidentlik muddati tugaganidan keyin dam olishga ketishni rejalashtirgan edi.
«Men 2027-yilda olti yillik prezidentlik muddatim tugaganidan keyin, agar Qamchi tayyor bo‘lsa, 2027-yilgi navbatdagi prezidentlik saylovida qatnashmasligim haqida o‘ylagan edim. U prezident bo‘lardi, men esa dam olishga ketardim. Menda shunday reja bor edi. Bundan bir yil oldin bu haqda unga o‘zim aytgan edim», — dedi Japarov.
«Qarasam, u tayyor emas ekan»
Japarovning so‘zlariga ko‘ra, u 4 yil chet elda yashagan, 4 yil qamoqda o‘tirgan va 6 yilni «go‘yo kuzatuv ostida» o‘tkazgan. Uning so‘zlariga ko‘ra, u oilasi bilan birga bo‘lishni xohlagan va Tashiyevdan «atrofidagi odamlarni tozalash va o‘z odamlarini tarbiyalashni» so‘ragan.
«Keyin qarasam — u tayyor emas ekan. Uning xodimlari o‘zlarini kerakli tarzda tutmayapti, uning atrofidagi odamlar juda yuqori darajalarga ko‘tarilib ketdi. 75 nafar oqsoqolning maktubi paydo bo‘lganida, parlamentni general tarafdorlariga bo‘la boshlashganida, men uni chaqirib, shunday dedim: “Bunday bo‘lmaydi. Odamlarni bo‘lish mumkin emas. Men xalqni shimol va janubga bo‘ladiganlarni qattiq jazolayman, axir xalq endigina birlasha boshlagan edi. Shuning uchun xafa bo‘lma, men seni lavozimdan olaman. Agar saylovda qatnashsang, buning uchun senga barcha sharoitlarni yaratib beraman», — dedi Japarov.
«U qayerda xato qilganini tushunishi kerak»
Sadir Japarov, shuningdek, Tashiyev uning do‘sti bo‘lib qolishini, ammo bundan buyon davlat lavozimini egallamasligini aytdi.
«Ha, biz 2005-yildan beri do‘st edik, oilalarimiz bilan muloqot qilib kelganmiz. 2020-yilda men ozodlikka chiqqanimdan va prezident bo‘lganimdan keyin uni MXDQ raisi etib tayinladim. Ha, u besh yil davomida yaxshi ishladi. Lekin bitta kamchiligi — u o‘zining do‘stlari va sinfdoshlarini nazorat qila olmadi. U lavozimidan ketdi.
Albatta, insonda kamchilik bo‘lmaydi degan gap yo‘q. Inson ishlayotgan ekan, unda kamchiliklar bo‘lishi tabiiy. U mening do‘stim bo‘lib qoladi, lekin uni biror lavozimga tayinlash rejam yo‘q.
U dam olishi, balki tahlil qilishi va qayerda xato qilganini tushunishi kerak. Men u faqat xatolarga yo‘l qo‘ygan, deb aytishdan yiroqman. Yo‘q, uning natijalari bor, mamlakatimizning muvaffaqiyatlariga qo‘shgan ulkan hissasi bor», — dedi prezident.
Avvalroq Bishkek sudi MXDQ sobiq rahbari Qamchibek Tashiyevni «75 lar xati» ishi bo‘yicha aybdor deb topgan edi. Unga mol-mulkini musodara qilish bilan birga 4 yil ozodlikdan mahrum qilish jazosi tayinlangan. Biroq sud uni jazoni o‘tashdan ozod qilib, 3 yillik probatsiya nazoratini belgilagan.
Eslatib o‘tamiz, avvalroq sud Qamchibek Tashiyev nima uchun qamoqqa jo‘natilmaganini tushuntirgandi.
