Қирғизистонда криптовалюта бозори айланмаси ярим йилда 25 млрд доллардан ошди

Қирғизистонда виртуал активлар билан ишловчи хизмат кўрсатувчи провайдерларнинг жами айланмаси 2 триллион 244 миллиард сомни (25,6 миллиард доллар) ташкил этди. Бу ҳақда Давлат молиявий назорат хизмати маълумот берди.

Бу 2026-йилнинг дастлабки олти ойи бўйича янгиланган маълумотлардир. Таққослаш учун, 2025-йилнинг олти ойида криптовалюта айирбошлаш шохобчалари ва криптобиржаларнинг умумий айланмаси 820 миллиард 690 миллион сом (тахминан 9,4 миллиард доллар) бўлган. 2025-йилнинг тўлиқ 12 ойи якунида эса бу кўрсаткич 2 триллион 735 миллиард 62,6 миллион сомни (31,28 миллиард доллар) ташкил этган.

2026-йилнинг дастлабки олти ойида жами 3 миллион 865 минг 252 та транзакция амалга оширилган. Криптовалюта айирбошлаш операторлари — энг катта улушга эга бўлиб, уларнинг айланмаси 2,2 триллион сомни(тахминан 25,3 миллиард доллар) ташкил этган. Операциялар сони — 3,84 миллионта. Криптобиржалар — айланмаси 34,7 миллиард сом (396,8 миллион доллар) бўлган. Уларда 25 мингдан ортиқ битим амалга оширилган.

Давлат молиявий назорат хизмати раиси Қайрат Маматовнинг айтишича, ҳозирда виртуал активлар соҳасини лицензиялаш ва тартибга солиш ваколати Қирғизистон Президенти ҳузуридаги Виртуал активлар ва блокчейн технологиялари миллий агентлигига берилган. Шу билан бирга, бозор устидан назорат қилиш ваколати ҳануз Давлат молиявий назорат хизматида қолмоқда. Шу сабабли идора компанияларни текширади ва белгиланган талабларга жавоб бермайдиган ташкилотларнинг лицензиясини бекор қилади.

Маматовнинг сўзларига кўра, яқинда криптобиржалардан бирининг лицензияси бекор қилинган. Бунга компания лицензия олганидан кейин бир йил давомида фаолиятини бошламагани сабаб бўлган. Шунингдек, компания белгиланган устав капитали ёки капитал талабларига жавоб бермаса, унинг лицензияси ҳам бекор қилиниши мумкин.

Раиснинг таъкидлашича, 2026-йил 1-июлдан бошлаб криптобиржалар капитали камида 300 миллион доллар бўлиши керак. Агар компаниялар ушбу талабга жавоб бермаса, уларнинг лицензиялари бекор қилина бошлайди. Унинг қўшимча қилишича, Қирғизистонда виртуал активлар бозори жуда тез ривожланмоқда. Ҳозирда мамлакат криптовалюталарни қабул қилиш даражаси бўйича дунё рейтингида 19-ўринда турибди.

Эслатиб ўтамиз, аввалроқ Қирғизистон Миллий банки активлари салкам 9,5 миллиард долларга етганди. Шунингдек, мамлакат Евроосиё иқтисодий иттифоқи давлатлари орасида саноат ўсиши бўйича яна етакчига айланганди.