Қирғизистонлик депутатлар Қозоғистон билан чегара тартибини ўзгартиришни талаб қилмоқда

Қирғизистон Жогорку Кенеши депутати Гуля Кожокулова Қозоғистон билан чегарадаги ўтказиш режимини ўзгартириш зарурлигини маълум қилди. Бу ҳақда 24.kg нашри хабар берди.

Қирғизистон Жогорку Кенеши депутати Гуля Кожокулова Қозоғистон билан чегарадаги ўтказиш режими бўйича масалани ҳал қилишга чақирди. У бу ҳақда «Қирғизистон Республикаси ҳукумати ва Қозоғистон Республикаси ҳукумати ўртасидаги давлат чегараси орқали ўтказиш пунктлари тўғрисидаги 2003 йил 25 декабрдаги келишувга ўзгартиришлар киритиш ҳақидаги, 2025 йил 22 августда Бишкек шаҳрида имзоланган протоколни ратификация қилиш тўғрисида»ги қонун лойиҳаси муҳокамаси чоғида сўз очди.

Депутатнинг сўзларига кўра, икки давлатнинг чегара олди ҳудудларида яшайдиган ва ишлайдиган кўплаб Қирғизистон ва Қозоғистон фуқаролари 90 га 180 режими билан боғлиқ чегарадаги ўтказиш пунктларидан ўтиш муаммоларидан шикоят қилмоқда (Қирғизистон фуқаролари Қозоғистонда (ва аксинча) 180 кунлик давр ичида 90 кундан ортиқ бўла олмайди - Таҳр.).

«Ўзингизга маълумки, чегарадан ўтишда рухсат берилган ўша 90 кун фуқароларнинг чиқиш ва киришларини қўшиш йўли билан ҳисобланади. Қозоғистон – биродар мамлакат, икки давлат президентлари ўртасида яхши муносабатлар шаклланган, наҳотки халқ қийналмаслиги учун ушбу 90 га 180 режимини олиб ташлаш мумкин бўлмаса?

Ахир бизни кўп нарса боғлаб туради, одамлар икки давлат бозорларида ишлашади, аралаш никоҳлар кўп. Бу масалани тезкорлик билан ҳал қилиш керак, агар керак бўлса халқ дипломатиясини ишга солиб, Қозоғистон билан музокараларда катта қатъият кўрсатиш лозим», – деб таъкидлади Гуля Кожокулова.

Вазиятнинг сабаб ва оқибатлари

Қирғизистон ташқи ишлар вазири ўринбосари Алмаз Имангазиев 90 га 180 режимини қўлламаслик масаласи Қозоғистон билан анчадан бери муҳокама қилинаётганини қайд этди.

«Ҳар йили биз буни қўшни давлат олдида кўтарамиз. Бироқ 2025 йилда сўровимизга жавоб олмадик ва Қозоғистон фуқароларига нисбатан ҳам шундай режимни қўллашга мажбур бўлдик. Агар эртага Қозоғистон ушбу режимни бекор қилса, биз ҳам дарҳол ундан воз кечамиз. Шу билан бирга таъкидламоқчиманки, Қозоғистон фуқаролари рўйхатдан ўтишда бюрократик тўсиқларга дуч келишмаяпти. Биз чегарадаги вазиятни доимий мониторинг қилиб боряпмиз ва айтишимиз мумкинки, Қирғизистонга кира олмаётган Қозоғистон фуқароларининг катта сони кузатилмаяпти. Шунингдек, ҳозирда қонунчиликка ўзгартиришлар киритиш орқали Қирғизистон ҳудудига кира олмаётган Қозоғистон фуқароларининг муайян тоифалари учун енгилликлар жорий этиш ниятидамиз», – дея қўшимча қилди у.