Ўзбекистон ОАВлари уч йилга фойда солиғидан озод этилиши мумкин

Ўзбекистонда оммавий ахборот воситаларини қўллаб-қувватлашга қаратилган Президент қарори лойиҳаси жамоатчилик муҳокамасига қўйилди.

Ҳужжатга мувофиқ, 2027 йил 1 январдан 2029 йил 31 декабрга қадар ОАВлар учун фойда солиғининг нол ставкаси жорий этилиши таклиф қилинмоқда.

Шунингдек, мазкур давр мобайнида Ўзбекистонга олиб кириладиган полиграфия ускуналари, замонавий фото, радио ва телевидение жиҳозлари, шунингдек, қоғозни божхона божидан озод этиш ҳам таклиф қилинмоқда.

Давлатга қарашли даврий нашрлар даромадлари ҳам тўлиқ солиқдан озод этилиши мумкин.

Миллий медиа жамғармаси ташкил этилади

Лойиҳага кўра, Ўзбекистон Журналистлар уюшмаси ҳузурида ОАВ ва журналистика фаолиятини қўллаб-қувватлаш миллий жамғармаси ташкил этилади.

Унинг асосий молиялаштириш манбаи сифатида давлат томонидан ҳар йили 40 миллиард сўм субсидия ажратилиши назарда тутилган.

Жамғарма маблағлари журналистика соҳасининг моддий-техник базасини мустаҳкамлаш, ходимлар меҳнатига ҳақ тўлаш, «Олтин қалам» мукофотини молиялаштириш ва даврий босма нашрларнинг расмий сайтларини ривожлантиришга йўналтирилади.

Нодавлат телерадиоканаллари ҳам танлов асосида ижтимоий аҳамиятга эга лойиҳалар учун молиявий ёрдам олиш имкониятига эга бўлади.

Журналистларга қўшимча рағбатлар берилади

Қарор лойиҳасида журналистларни моддий рағбатлантириш чоралари ҳам кўзда тутилган.

Ташаббусларга кўра, ҳар чоракда ОАВда эълон қилинган 20 та энг долзарб материал муаллифи 12,36 млн сўмдан пул мукофоти билан тақдирланиши мумкин.

Шунингдек, ҳар йили таҳририятлар ўртасидаги танлов доирасида энг яхши 100 та таҳлилий материал учун 41,2 млн сўмдан мукофот ажратиш таклиф этилмоқда. Ёш журналистларни рағбатлантириш мақсадида эса ҳар йили 50 нафар талабанинг контракт тўловини қоплаш режалаштирилган.

Лойиҳа доирасида коррупция муаммоларини ўрганишга бағишланган «Журналистик ечимлар» дастурини ишга тушириш ва ҳар йили 12 та материал учун 61,8 млн сўмдан грант ажратиш таклиф қилинмоқда.