Қирғизистоннинг энг йирик банки Лондонда IPO ўтказиш ва юанда облигациялар чиқаришга тайёрланмоқда

Қирғизистоннинг энг йирик давлат банки ҳисобланган «Элдик Банк» 2026 йил охирига қадар Гонконг бозорида 500 миллион долларгача бўлган миқдорда Dim Sum облигацияларини жойлаштиришни режалаштирмоқда. Бу ҳақда банк бошқаруви раиси Уланбек Ногаев «Bloomberg» агентлигига маълум қилди.

Ушбу жойлаштириш жараёни жорий йилнинг декабрь ойидаёқ амалга ошиши мумкин. Бу қадам банкнинг инвесторлар томонидан юқори талаб билан кутиб олинган 500 миллион долларлик дебют еврооблигациялар чиқаришидан бир неча ой ўтиб юз бермоқда.

Ногаевнинг сўзларига кўра, юандаги қарзлар доллардагига қараганда арзонроқ тушади ва Қирғизистоннинг инфратузилма лойиҳаларини молиялаштириш учун кўпроқ мос келади. Бундай лойиҳаларнинг катта қисми Хитой иштирокида амалга оширилмоқда. Шунингдек, 2027 йилда банк доллар облигацияларининг навбатдаги чиқарилишини ҳам режалаштирмоқда.

Лондон биржасидаги илк Қирғизистон компанияси

Бунга параллел равишда, «Элдик Банк» 2028 йилда Лондон фонд биржасида (LSE) IPO ўтказишга тайёргарлик кўрмоқда. Банк аллақачон корпоратив қайта қуришни бошлаган ва давлат акцияларнинг 20 фоизигача бўлган қисмини сотиш имкониятини кўриб чиқмоқда. Агар жойлаштириш муваффақиятли ўтса, «Элдик Банк» Лондон биржасига чиққан биринчи қирғиз компаниясига айланади.

Қирғизистон 2025 йилда суверен еврооблигацияларни жойлаштирганидан сўнг, жалб қилинган маблағларнинг бир қисми «Элдик Банк»ни қўшимча капиталлаштиришга йўналтирилган эди. Натижада унинг капитали беш баравардан кўпроққа ўсиб, 80,1 миллиард сомни (930 миллион доллар) ташкил этди.

Санкция хавфлари ва инвесторлар хавотири

Бироқ, банкнинг халқаро бозорларга чиқиши санкция хавфлари сабабли мураккаблашмоқда. АҚШ томонидан Қирғизистоннинг «Керемет Банк»ига қарши санкциялар жорий этилганидан сўнг, инвесторлар «Элдик Банк»нинг доллар облигацияларини оммавий равишда сота бошладилар. Бунга Қирғизистон банк тизимининг Россиянинг А7 тўлов компанияси билан эҳтимолий алоқалари ҳақидаги хавотирлар сабаб бўлди.

«Элдик Банк» А7 тўлов компанияси билан ҳамкорликни қатъиян инкор этади. Банк ўз санкция назоратини кучайтириш мақсадида Dentons, Kroll ва EY каби халқаро консалтинг компанияларини жалб қилган.

Маълумот учун, ўтган ҳафтада Қирғизистон 2027 йилда илк бор юанда суверен облигацияларни жойлаштириш режалари ҳақида эълон қилган эди.

Марказий Осиё давлатлари халқаро сармоя бозорларига тобора фаолроқ чиқмоқда. Хусусан, Қозоғистон аллақачон юанда облигацияларни фаол жойлаштираётган бўлса, Ўзбекистон бу йил Миллий инвестиция фондини Лондон биржасига олиб чиқди.