Россиядаги ҳибсхонасида туғилган ўзбекистонлик қизалоқ ватанга қайтарилди
Россия ҳибсхонасида дунёга келган 1 ёшли ўзбекистонлик қиз дипломатик ёрдам билан ватанига қайтди.
Россия Федерациясининг Саха Республикасида оилавий тарбияга кўмаклашиш марказида яшаётган бир ёшли Ўзбекистон фуқароси бўлган қиз ватанга қайтарилди. Бу ҳақда «Дунё» ахборот агентлиги хабар қилди.
Маълум қилинишича, боланинг онаси Россия ҳудудида ўта йирик миқдордаги гиёҳвандлик воситаларининг ноқонуний айланиши билан боғлиқ жиноятда айбдор деб топилиб, 9 йил муддатга озодликдан маҳрум этилган. У жазо ўтаётган пайтида фарзандини ҳибсхонада дунёга келтирган.
Чақалоқ туғилгандан сўнг, она қамоқда қолгани сабабли бола Саха Республикасидаги оилавий тарбияга кўмаклашиш марказига жойлаштирилган. Қизча бир ёшга тўлгунга қадар шу муассасада тарбияланган.
Кейинчалик маҳкума аёлнинг онаси неварасини олиб кетиш мақсадида Россиянинг Саха Республикасига борган ва Ўзбекистоннинг Владивостокдаги Ўзбекистон Бош консулхонасига ёрдам сўраб мурожаат қилган.
Дипломатик ваколатхона томонидан болани Ўзбекистонга қайтариш учун зарур бўлган махсус сертификат расмийлаштирилган. Россия ҳукумати кўмагида барча ҳуқуқий ва ташкилий масалалар ҳал этилгандан сўнг, қизча белгиланган тартибда бувисига топширилган.
Шунингдек, Ўзбек диаспораси фаоллари кўмагида буви ва набира учун «Ёқутистон–Новосибирск–Тошкент» йўналиши бўйича авиачипталар харид қилинган. Натижада, қизалоқ ўз ватанига соғ-саломат етиб келган.
