Саида Мирзиёева АҚШ Давлат котиби билан учрашди
Вашингтонда бўлиб ўтган учрашувларда Ўзбекистон–АҚШ иқтисодий ҳамкорлиги, янги инвестиция лойиҳалари ва қўшма платформа ишга тушириш режалари муҳокама қилинди.
Вашингтон шаҳрида Ўзбекистон Президенти Администрацияси раҳбари Саида Мирзиёева АҚШ Давлат котиби Марко Рубио билан бизнес-нонушта форматида учрашув ўтказди. Суҳбат давомида икки томонлама иқтисодий ҳамкорликнинг долзарб йўналишлари кўриб чиқилди.
Учрашувда Америка–Ўзбекистон ишбилармонлик ва инвестиция кенгашининг сўнгги йиғилиши натижалари муҳокама қилиниб, қўшма лойиҳалар портфелининг изчил кенгайиб бораётгани қайд этилди. Томонлар стратегик шерикликни янада чуқурлаштириш масалаларига алоҳида эътибор қаратди.
Саида Мирзиёева АҚШ томонининг Ўзбекистон иқтисодиётига қўшаётган ҳиссасини юқори баҳолаб, бу жараёндаги амалий қўллаб-қувватлаш учун миннатдорлик билдирди.
«Стратегик шериклигимизни янада ривожлантиришга қўшаётган катта ҳиссаси учун жаноб Давлат котибига ўз миннатдорлигимни билдираман», — деди Саида Мирзиёева ўз Telegram каналида.
Унинг таъкидлашича, икки давлат ўртасидаги ишонч ва ҳамкорлик янги босқичга чиқмоқда.
Шунингдек, АҚШ Халқаро молиявий тараққиёт корпорацияси раҳбари Бен Блек билан алоҳида учрашув бўлиб ўтди. Мулоқот давомида Ўзбекистонда амалга оширилаётган йирик инвестиция лойиҳалари муҳокама қилинди.
Томонлар DFC орқали америкалик сармоядорларни жалб қилиш, инвестициявий хатарларни камайтириш ва молиявий қўллаб-қувватлаш механизмларини кенгайтириш масалаларини кўриб чиқди. Шу билан бирга, 2026 йил давомида қўшма инвестиция платформасини ишга тушириш режаси ҳам билдирилди.
Эслатиб ўтамиз, аввалроқ Саида Мирзиёева АҚШ пойтахти Вашингтон шаҳрида Америка–Ўзбекистон ишбилармонлик ва инвестиция кенгаши ҳамраиси, элчи Сержио Гор билан музокаралар ўтказгани ҳақида хабар берилган эди.
