Smartfon narxlari yana ikki yil davomida qimmatlashi kutilmoqda — «Xiaomi» rahbari
«Xiaomi» rahbariyati komponentlar qimmatlashuvi tufayli global elektronika bozorida yangi narx bosimi kuchayishini taxmin qilmoqda.
© Getty images«Xiaomi» bosh direktori Ley Szyun smartfonlar narxi yaqin ikki yil ichida ham o‘sishda davom etishi mumkinligini ma’lum qildi.
Uning ta’kidlashicha, bu jarayon vaqtinchalik holat emas va elektron qurilmalar ishlab chiqarish zanjirida kuzatilayotgan uzoq muddatli tendensiya hisoblanadi.
Kompaniya rahbari so‘zlariga ko‘ra, ayrim asosiy komponentlar narxining o‘sishi hozirning o‘zida qurilmalar ishlab chiqarish xarajatlariga bosim o‘tkazmoqda.
Xotira bozori bosimi
Ley Szyunning aytishicha, asosiy muammo operativ xotira hamda ma’lumot saqlash to‘plagichlari narxi bilan bog‘liq.
Uning ta’kidlashicha, o‘tgan yili ham kompaniya ushbu yo‘nalishdagi qimmatlashuv haqida birinchi bo‘lib ochiq ogohlantirishlar bergan edi.
Hozirgi vaqtda mazkur komponentlar narxining o‘sishi smartfonlar bilan cheklanib qolmayapti. Bu holat planshetlar, noutbuklar va boshqa maishiy elektronika mahsulotlarining ishlab chiqarish xarajatlariga ham ta’sir ko‘rsatmoqda.
Kompaniya qo‘shimcha xarajatlarni to‘liq iste’molchilar zimmasiga yuklamaslikka harakat qilayotganini bildirmoqda.
Yangi narx bosqichi
Ley Szyun ta’minot zanjirlarini optimallashtirish va ichki texnologik yechimlar orqali xarajatlarni qisman qoplash mumkinligini aytdi.
Biroq kompaniya vakillari fikricha, xotira narxlari hozirgi sur’atlarda o‘sishda davom etsa, qurilmalarni avvalgi narxlarda saqlash tobora murakkablashadi.
«Xiaomi Group» prezidenti Lu Veybin avvalroq xotira mahsulotlari qimmatlashuvi 2027 yil oxirigacha, ehtimol 2028 yilgacha davom etishi mumkinligini bildirgan edi.
Uning bahosiga ko‘ra, Xitoyning ayrim flagman smartfonlari narxi yil yakunigacha 10 ming yuandan oshib ketishi mumkin, bu taxminan 1470 dollarni tashkil etadi.
Bozorda bu ta’sir allaqachon sezilmoqda, 2026-yil mart oyidan boshlab Xitoyda ko‘plab smartfon modellari narxi 200−400 yuanga — taxminan 29−59 dollarga oshdi.
Avvalroq «Samsung» xotira chiplari tanqisligi tufayli smartfon va elektronika narxlari oshishini ma’lum qilgan edi.
«Counterpoint Research» tahlilchilariga ko‘ra, 2026 yil ikkinchi choragiga kelib xotira modullari narxi 50 foizgacha oshishi mumkin.
Ayrim yirik kompaniyalar — «Dell», «Xiaomi» va «Lenovo» — allaqachon zaxiralarni ko‘paytirish yoki mijozlarni ehtimoliy qimmatlashish haqida ogohlantirishga kirishgan.
