SQB’нинг молдовалик раиси, такомиллашган ўзбек алифбоси ва Давактивга ўтган «Халқ суғурта — 21 октябр дайжести

2030-йилдан шифокор ва фармацевтлар давлат рўйхатидан ўтиши шарт бўлади

Ҳукумат қарорига асосан, 2030 йил 1 январдан бошлаб Ўзбекистонда тиббиёт ва фармацевтика фаолияти билан фақат тегишли мутахассислик бўйича давлат рўйхатидан ўтган шахсларгина шуғулланишига рухсат этилади. Беш йил муддатга бериладиган ушбу рўйхатдан ўтмаганларнинг касбий фаолият юритиши тақиқланади ва бу жараён 2027 йил 1 июлдан 2030 йилга қадар ихтиёрий тартибда амалга оширилади.

Рўйхатдан ўтиш жараёни Давлат хизматлари марказлари, ЯИДХП ёки махсус платформа орқали электрон тарзда амалга оширилади ва гувоҳнома фақат ягона электрон реестрда шакллантирилади. Шу билан бирга, мутахассислиги бўйича камида 20 йиллик узлуксиз иш стажи ва илмий даражага эга бўлган ходимлар махсус имтиҳонларсиз рўйхатдан ўтказилиши белгиланган.

Халқ банкининг суғурта компанияси Давактив тасарруфига ўтказилди

Халқ банкининг шўба корхонаси бўлган «Xalq Sug‘urta» акциядорлик жамиятининг 100 фоиз акциялари Давлат активларини бошқариш агентлиги (Давактив) тасарруфига ўтказилди. Устав капитали 80 миллиард сўмга тенг бўлган мазкур компания акцияларига эгалик ҳуқуқи 16 октябрь куни ўзгарган бўлиб, бу қадам уни хусусийлаштиришга тайёрлаш жараёнининг асосий қисми ҳисобланади. Тегишли Президент фармонига мувофиқ, ушбу суғурта компаниясининг давлат улушини 2026–2027 йилларда оммавий савдоларга чиқариш режалаштирилган.

Ҳозирча акцияларнинг қачон савдога чиқарилиши ва бошланғич нархи эълон қилинмаган. Молиявий кўрсаткичларга кўра, 2011 йилда ташкил этилган мазкур компания хусусийлаштириш жараёнига ижобий натижалар билан кириб бормоқда: жорий йилнинг биринчи ярмида унинг жами активлари 278,5 миллиард сўмдан ошган ва компания 15,4 миллиард сўм соф фойда кўрган.

Тил байрами кунида тарихий қарор: ўзбек алифбосини такомиллаштириш қонуни имзоланди

Ўзбек тили байрами кунида Президент Шавкат Мирзиёев лотин ёзувига асосланган ўзбек алифбосини такомиллаштиришга қаратилган қонунни имзолади. Мазкур тарихий қарор йиллар давомида жамиятда турли баҳс-мунозараларга сабаб бўлиб келган алифбо масаласига узил-кесил ҳуқуқий ечим бўлди. Таъкидланишича, бу ўзгариш бутунлай янги алифбо жорий этишни эмас, балки мавжуд ёзувни бугунги эҳтиёжлар ва тўпланган тажриба асосида такомиллаштиришни кўзда тутади.

Муҳими шундаки, бу жараён аҳоли учун қўшимча ташвиш ёки бирданига катта харажат келтириб чиқармайди. Амалдаги ҳужжатлар, ўқув дарсликлари ва бошқа материалларни зудлик билан алмаштириш талаб этилмайди. Ушбу воситалар ўз муддатини ўтаб бўлгач, навбатдаги янгиланиш вақтида такомиллаштирилган алифбога босқичма-босқич мослаштириб борилади.

Тадбиркор президентга кийим совға қилди

Президент Шавкат Мирзиёев 21 октябрь куни Қашқадарё вилоятидаги «Sulton Tex Group» тўқимачилик кластерининг янги фабрикаси билан танишди. Қиймати 54 миллион доллар бўлган мазкур лойиҳа йилига 20 минг тонна мато ишлаб чиқариш ва бўяш қувватига эга бўлиб, у ерда 840 та иш ўрни яратилган. Корхонада ресурсларни тежашга алоҳида эътибор қаратилган: ишлаб чиқаришда узлуксизликни таъминловчи газ генератори, томдаги 3,5 мегаваттли қуёш панеллари ва сувнинг 95 фоизини тозалаб қайта ишлатувчи 3 миллион долларлик ёпиқ тизим маҳсулот таннархини сезиларли пасайтиришга хизмат қилади.

Келгусида ушбу кластер томонидан вилоят бўйлаб жами 87 миллион долларлик янги лойиҳаларни амалга ошириш ва 4790 та янги иш ўрни яратиш кўзда тутилган. Давлат раҳбари мазкур тежамкор технологиялар бошқа корхоналарга намуна бўлиши кераклигини таъкидлаган бўлса, ташриф давомида тадбиркор Президентга кластерда ишлаб чиқарилган кийимни совға қилиб, уни ош пиширганда кийишни тавсия қилди. Бунга жавобан Шавкат Мирзиёев маҳаллий маҳсулотни «Made in Qashqadaryo» дея эътироф этди.

Молдовалик молиячи «Ўзсаноатқурилишбанк» кузатув кенгашининг раиси бўлди

Молдовалик таниқли иқтисодчи ва молиячи Сержиу Чокля «Ўзсаноатқурилишбанк» (SQB) кузатув кенгашининг янги раиси этиб сайланди. Учта давлат фуқаролигига эга бўлган 52 ёшли мутахассис халқаро молия тизимида, жумладан, Франциянинг йирик «BNP Paribas» банк гуруҳида 17 йилдан ортиқ фаолият юритган ҳамда 2016–2018 йилларда Молдова Миллий банки раиси сифатида йирик банк инқирозидан сўнг тизимни барқарорлаштиришда муҳим рол ўйнаган.

Маълумот ўрнида, «Ўзсаноатқурилишбанк» жорий йилнинг биринчи ярмида соф фойдасини 36,7 фоизга ошириб, 1,1 триллион сўмга етказди ва бунга фоизсиз даромадларнинг 202 фоизга кескин ўсиши сабаб бўлди. Шунингдек, Миллий инвестиция жамғармаси (UzNIF) таркибида Лондон ва Тошкентда IPO’га чиқарилган ушбу банкнинг жорий йилда кредитлар бўйича захира учун ўтган йилга нисбатан 4,7 триллион сўм кўпроқ маблағ ажратгани айнан шу жараёнга тайёргарлик сифатида баҳоланмоқда.