Tojikiston tashqi savdosi 21 foizga o‘sdi, ammo defitsit kuchaydi

2026-yil yanvar–aprel oylarida Tojikistonning tashqi savdo aylanmasi 3,769 mlrd dollarni tashkil qildi. Bu o‘tgan yilning shu davriga nisbatan 21 foizga ko‘p, deya xabar berdi mamlakat prezidenti huzuridagi Statistika agentligi.

Shu bilan birga, savdo balansi keskin manfiy shakllandi: defitsit 2,395 mlrd dollarni tashkil etdi.
Tojikiston ushbu davrda dunyoning 119 ta mamlakati bilan savdo qildi. Mamlakatning asosiy savdo hamkorlari Xitoy, Rossiya, Qozog‘iston, O‘zbekiston va Eron bo‘lib qolmoqda.

Eksport
Joriy yilning to‘rt oyida respublika 687 mln dollarlik tovar eksport qildi. Bu 2025-yil yanvar–aprel oylariga nisbatan 8,1 foizga yoki 51,5 mln dollarga ko‘pdir.

Eksport o‘sishi asosan mineral mahsulotlar hisobiga ta’minlandi – ularning yetkazib berilishi 1,6 baravarga yoki 119,2 mln dollarga oshdi. Shuningdek, qimmatbaho va yarim qimmatbaho toshlar hamda metallar eksporti 7,3 baravarga (7,6 mln dollarga), o‘simlik mahsulotlari 1,6 baravarga (9,4 mln dollarga), to‘qimachilik va to‘qimachilik mahsulotlari esa 11,6 foizga (8,2 mln dollarga) ko‘paydi.

Paxta tolasi eksporti 13,1 foizga yoki 5,5 mln dollarga oshdi. Mashina, uskuna va mexanizmlar yetkazib berish hajmi 11,5 baravarga (13 mln dollarga), transport vositalari eksporti esa 3,7 baravarga (3,5 mln dollarga) o‘sdi.

Ayni paytda, qimmatbaho bo‘lmagan metallar va ulardan tayyorlangan mahsulotlar eksporti 75,1 mln dollarga, kimyo sanoati mahsulotlari 1,1 mln dollarga, tirik hayvonlar va hayvonot mahsulotlari esa 0,7 mln dollarga qisqardi.

2026-yil yanvar–aprel oylarida tojik mahsulotlarining asosiy xaridorlari Xitoy, Turkiya, Belgiya, O‘zbekiston, Rossiya, Qozog‘iston va Eron bo‘ldi.

Import

Import esa ancha yuqori sur’atda o‘sib, 24,3 foizga yoki 603,4 mln dollarga ko‘paydi va 3,82 mlrd dollarga yetdi. Shu tariqa, mamlakatga olib kirilgan tovarlar hajmi eksportdan qariyb 4,5 baravar yuqori bo‘ldi.

Import deyarli barcha yirik tovar guruhlari bo‘yicha oshdi. Eng katta o‘sish qimmatbaho bo‘lmagan metallar va ulardan tayyorlangan mahsulotlar hisobiga to‘g‘ri keldi – 187,3 mln dollar. Shuningdek, mashina va uskunalar importi 136,6 mln dollarga, mineral mahsulotlar 79,9 mln dollarga, o‘simlik mahsulotlari 67 mln dollarga, transport vositalari esa 52,9 mln dollarga ko‘paydi.

Bundan tashqari, tayyor oziq-ovqat mahsulotlari, kimyoviy mahsulotlar, plastmassa, yog‘och va yog‘och mahsulotlari, to‘qimachilik, yog‘-moy mahsulotlari, shuningdek tirik hayvonlar va hayvonot mahsulotlari importi ham oshdi.

Tovarlar asosan Rossiya, Xitoy, Qozog‘iston, O‘zbekiston, Eron, Janubiy Koreya, Belarus, Turkiya va Germaniyadan keltirildi.