Тўқаевга ЮНЕСКО бош директоридан хат келди
У ўз мактубида Қозоғистон раҳбарига миннатдорлик билдирган.
Қозоғистон Президенти Қосим-Жомарт Тўқаевга ЮНЕСКОнинг янги тайинланган бош директори Ҳолид ал-Ананийдан миннатдорчилик ва ҳамкорликни давом эттириш нияти акс этган мактуб келди.
Оқўрда матбуот хизматига кўра, мисрлик олим ва дипломат бўлган ал-Ананий Қозоғистон раҳбарига унинг ЮНЕСКО бош директори лавозимига сайланиши муносабати билан йўллаган табриги учун чуқур миннатдорлик билдирган.
Ҳолид ал-Ананий ташкилотнинг таълим, фан, маданият, алоқа ва ахборот соҳаларидаги асосий устувор йўналишларини амалга оширишга содиқлигини таъкидлаган.
Мактуб сўнгида бош директор умумий қадриятларни ривожлантириш йўлида Қозоғистон билан яқин ҳамкорликни давом эттиришга тайёрлигини тасдиқлаган.
ЮНЕСКО сайти маълумотларига кўра, Ҳолид ал-Ананий асли мисрлик. У ташкилот бош директори лавозимига 15 ноябрда киришган. ЮНЕСКО бош конференциясида янги раҳбар 179 овоздан 172 тасини қўлга киритган.
У ЮНЕСКОнинг 12-бош директори ҳисобланади ва араб мамлакатидан чиққан биринчи бош директордир.
