Трамп Путиннинг Валдайга ҳужум ҳақидаги баёнотига ишонмади

АҚШ президенти Доналд Трамп Украина Қуролли кучлари Валдайдаги Владимир Путин қароргоҳига зарба бергани ҳақидаги Кремл баёнотига ишонмаслигини маълум қилди. У бу ҳақда журналистларга ўз самолёти бортида сўзлаб берди.

«Мен бу зарба бўлганига ишонмайман. Яқин атрофда нимадир содир бўлган, лекин бу қароргоҳ билан боғлиқ эмас», — деди Трамп. Унинг таъкидлашича, қўшимча текширувлардан сўнг АҚШ маъмурияти ушбу версияни тасдиқловчи далилларни кўрмаган.

29 декабр куни Россия ташқи ишлар вазири Сергей Лавров Киев Новгород областида жойлашган Путин қароргоҳига 91 та дрон билан ҳужум уюштирганини маълум қилган эди. Унинг сўзларига кўра, мазкур ҳолат Россиянинг АҚШ билан Украинадаги урушни тугатиш бўйича музокаралардаги позициясига таъсир қилиши мумкин эди.

Трамп журналистлар саволига жавобан, нега аввал Путин сўзларига ишонганини ҳам изоҳлади. «Ўша пайтда бу ҳақда бошқа маълумот йўқ эди. Энди эса текшириб чиқдик ва бу воқеа содир бўлганига ишонмаймиз», — деди у.

Кремл Лавров баёнотидан кейин далилларни тақдим этишдан бош тортган ва шубҳаларни «ақлсизлик» деб атаган. Кейинчалик «The Wall Street Journal» нашрининг ёзишича, МРБ ҳам Россия томони тақдим этган версияга ишонмаган. Манбаларга кўра, Украина дронлари ҳарбий объектни нишонга олган бўлиши мумкин, аммо улар Путин қароргоҳи жойлашган ҳудуд яқинига учмаган.

Шундан сўнг Трамп «New York Post» газетасида эълон қилинган «Путиннинг “ҳужум” ҳақидаги жанговар баёнотлари айнан Россия тинчликка тўсиқ бўлаётганини кўрсатади» сарлавҳали мақолага ҳавола қолдирган.

Россия Мудофаа вазирлиги эса АҚШ томонига уриб туширилган дронлар йўналиши ва уни бошқариш маълумотлари юборилганини айтиб, зарба айнан Путин қароргоҳига қаратилганини исботлашга уринди.

Украина президенти Володимир Зеленский эса Кремл баёнотларини «фейк» деб атаб, уларнинг мақсади Украина ва АҚШ ўртасидаги тинчлик музокараларини издан чиқариш эканини таъкидлаган эди.