Туркманистонда кўчада савдо учун жарима оширилади

Туркманистонда 1-майдан бошлаб қўлда савдо қилиш ёки хизмат кўрсатиш учун белгиланмаган жойларда фаолият юритганлик учун жарималар оширилади, деб хабар берди «Бизнес Туркменистан».

Президент Сердар Бердимуҳамедов маъмурий ҳуқуқбузарликлар тўғрисидаги кодексга ўзгартиш ва қўшимчалар киритиш ҳақидаги қонунни имзолади.

Ошган жарималар

Ўзгаришларга кўра, кўчаларда, майдонларда, ҳовлиларда, уй кириш жойларида ва қонунчиликда белгиланмаган бошқа жойларда қўлда савдо қилиш ёки хизмат кўрсатиш учун энди огоҳлантириш, товарларни бепул мусодара қилиш ёки 50 дан 100 манатгача (14-28 доллар) жарима қўлланиши мумкин.

Аввал бу қоида бузилганда жарима 30 дан 50 манатгача (8,5-14 доллар) бўлган.

Шунингдек, 1 майдан бошлаб спиртли маҳсулотлар муомаласи ва ҳужжатларсиз транспорт бошқариш учун ҳам жарималар ўзгаради. Жисмоний шахслар учун маркаланмаган истеъмол қадоқидаги алкоголли ичимликлар ва тамаки маҳсулотларини сотиш, сақлаш, ташиш ёки сотиш мақсадида харид қилиш учун жарима эндиликда 3 дан 5 базавий миқдоргача белгиланди (аввалги чегара — 5 гача бўлган).

Туркманистонда базавий миқдор – Вазирлар Маҳкамаси томонидан белгиланадиган ва маъмурий жарималарни ҳисоблаш учун қўлланиладиган қатъий пул бирлиги бўлиб, ҳозирги кунда 100 манатни ташкил этади. Мансабдор шахслар учун жарима 5 дан 10 базавий миқдоргача (142-285 доллар), юридик шахслар учун эса 10 дан 20 базавий миқдоргача (285-571 доллар) оширилди.

Янги қоидалар ҳам киритилди. Бешинчи қисм лицензиясиз алкогол, пиво, вино материаллари ва тамаки маҳсулотларини тайёрлаш, сотиб олиш, сақлаш, ташиш, жўнатиш ва сотиш учун жавобгарлик белгилайди. Бунда жисмоний шахсларга 6 дан 8 базавий миқдоргача (600-800 манат), юридик шахсларга эса 30 дан 50 базавий миқдоргача (3 минг - 5 минг манат) жарима солинади, товарни мусодара қилиш ҳам мумкин.

Олтинчи қисм бир йил ичида такроран ҳуқуқбузарлик содир этилганда кучайтирилган жавобгарликни жорий этади. Бунда жисмоний шахслар учун жарима 10 дан 15 базавий миқдоргача (1 минг-1,5 минг манат), юридик шахслар учун 60 дан 100 базавий миқдоргача (6000-10000 манат) белгиланган бўлиб, маҳсулотни мусодара қилиш имконияти ҳам мавжуд.

Ҳайдовчилик гувоҳномасисиз машина ҳайдаш

2026 йил 1 майдан бошлаб ҳайдовчилик гувоҳномаси ёки ишончнома (доверенность) қўлда бўлмаган ҳолда транспорт воситасини бошқарганлик учун жарима 0,5 базавий миқдордан 1 базавий миқдоргача оширилади.

Ишончномасиз бошқариш ёки рулни бундай ҳуқуқни тасдиқловчи ҳужжати йўқ шахсга топшириш учун аввалги 2 базавий миқдордаги қатъий жарима ўрнига энди 2 дан 3 базавий миқдоргача бўлган диапазон белгиланган.

Ҳайдовчилик гувоҳномаси умуман йўқ ёки бошқариш ҳуқуқи чекланган шахс томонидан транспортни бошқариш учун жазо кучайтирилиб, 3–5 базавий миқдордан 5–8 базавий миқдорга оширилди. Бундай шахсга транспортни бериш учун жарима 4 дан 6 базавий миқдоргача белгиланди.

Шунингдек, биринчи марта алоҳида таркиб сифатида муддати ўтган ҳайдовчилик гувоҳномаси ёки вақтинчалик рухсатнома билан транспорт бошқариш жорий этилди. Бу ҳолат учун 3 дан 5 базавий миқдоргача жарима белгиланади.