«Ucell» компаниясининг собиқ раҳбари отасининг ўлими ҳақида илк бор очиқ гапирди

«Ucell» компаниясининг собиқ бош директори ва «Uzmobile»га ҳам бир муддат раҳбарлик қилган Владимир Кравченко отасининг фожиали ўлими ҳақида жамоатчиликка илк бор очиқ маълумот берди.

Кравченконинг айтишича, унинг отаси ўз вақтида алоқа вазирининг биринчи ўринбосари лавозимида фаолият юритган. 1996 йилда Ўзбекистоннинг биринчи президенти Ислом Каримов уни вазир лавозимига тайинлаш масаласини кўриб чиққан. Суҳбатлар давомида унга икки ҳафта ичида вазир бўлиши айтилган, аммо орадан бир ҳафта ўтиб, у фожиали равишда ўлдириб кетилган.

«Суҳбатга киряптилар. Икки ҳафтадан кейин вазир бўласан, дейишяпти. Бир ҳафтадан кейин эса шу иш бўляпти. Кўз олдимда ўлдириб кетишган», — дейди у.

Кравченко ушбу воқеа унинг кўз ўнгида содир бўлганини айтиб, бу ҳаётидаги энг оғир хотиралардан бири эканини таъкидлади. Унинг сўзларига кўра, ҳодисадан сўнг икки нафар шахс қўлга олинган, аммо қотилликнинг асл сабаблари ва буюртмачилари расман очиқланмаган.

Шунингдек, Кравченко қотиллар воқеа жойидан 500 та видеокассетани олиб кетганини маълум қилди. Ушбу материалларда нима акс этгани ва уларнинг жиноятга қандай алоқадор экани ҳозирга қадар номаълум бўлиб қолмоқда.

Маълумот ўрнида, Владимир Кравченко 1985 йилда туғилган. У Тошкент халқаро Вестминстер университетини тамомлаган. 2018 йилда у «Ucell» компаниясига бош директор этиб тайинланган ва телекоммуникация соҳасида фаолият юритган.