УЕФА Россия клубларига €11 млн тўлади, украиналикларни эса рад этди

Британиянинг «The Guardian» нашрига кўра, УЕФА томонидан Россиянинг бир неча клубига умумий ҳисобда €10,8 миллионлик молиявий ёрдам кўрсатилган. Бу маблағлар «бирдамлик тўловлари» деб аталувчи тоифага киради ва улар, одатда, еврокубокларда қатнашмаган клубларга ажратилади. Эътиборлиси, Украинада уруш туфайли футбол инфратузилмаси вайрон бўлган, бир қатор клублар ўз фаолиятини вақтинча тўхтатган. Бироқ, шу ҳолатда ҳам бешта Украина клуби — «Черноморец» ва «Реал Фарма» (Одесса), «Металлург» (Запороже), «Феникс» (Мариупол) ва «Металлист» (Харков) — УЕФАдан ҳеч қандай маблағ олмаган. Мазкур жамоалар УЕФА президенти Александр Чеферинга мурожаат хати билан чиққан. У дастлаб бу ҳолатга ойдинлик киритишни ваъда қилган, аммо кейин бу масалани мутлақо эътиборсиз қолдирган. «The Guardian» манбаларига таяниб ёзишича, Россия УЕФАдаги таъсирини сақлаб қолмоқда. Масалан, УЕФАнинг қоидаларга риоя этилишини назорат қилувчи қўмитасида Полина Юмашева — россиялик миллиардер Олег Дерипасканинг собиқ рафиқаси — аъзо бўлиб турибди. Бу эса ташкилотда Россия манфаатлари ҳали ҳам ҳимоя қилинаётганидан далолат беради.