Янги қонун: Ёқилғи-энергетикага оид ҳуқуқбузарликларга жазо кучайтирилади

31 октябр куни Олий Мажлис Сенатининг ялпи мажлисида «Ёқилғи-энергетика соҳасидаги ҳуқуқбузарликларга қарши курашиш чоралари такомиллаштирилиши муносабати билан Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун муҳокама қилинди.

Таъкидланишича, мажлисда ёқилғи-энергетика соҳасида таъсирчан давлат назоратини таъминлаш борасида кенг кўламли ишлар амалга оширилаётганлиги қайд этилди. Ёқилғи-энергетика ресурслари билан боғлиқ ҳуқуқбузарликларнинг олдини олиш бўйича тегишли чоралар кўриш, электр ва иссиқлик энергиясини беҳуда сарфлаш, газдан ёқилғи ёки хомашё сифатида фойдаланишга оид ҳуқуқбузарликларни содир этганлик учун жавобгарликка тортиш чораларини такомиллаштириш лозимлиги таъкидланди.

Ушбу қонун билан Жиноят кодексида электр, иссиқлик энергиясидан, газ ва сув ўтказгичдан фойдаланиш қоидаларини бузганлик учун жазо чораларини кучайтириш назарда тутилмоқда.

Шунингдек, Маъмурий жавобгарлик тўғрисидаги кодексга ҳуқуқни қўллаш амалиётидаги ноаниқликларни бартараф этишга, якка тартибдаги тадбиркорлар томонидан ёқилғи-энергетика ресурсларидан фойдаланишдаги ҳуқуқбузарликлар содир этилишининг олдини олишга ҳамда бундай қоидабузарликлар учун жазо чораларининг таъсирчанлигини оширишга қаратилган ўзгартиришлар киритилмоқда.

Сенаторлар ушбу қонун ёқилғи-энергетика ресурслари билан боғлиқ ҳуқуқбузарликларнинг олдини олиш ҳамда иқтисод қилинган энергия ресурсларини саноатнинг бошқа тармоқларига йўналтириш, қолаверса, уларнинг экспортини ошириб, импортини камайтиришга хизмат қилишини таъкидлашди.

Муҳокама якунида қонун сенаторлар томонидан маъқулланди.

Эслатиб ўтамиз, мазкур қонун лойиҳаси 2025 йил 15 июл куни Олий Мажлис Қонунчилик палатаси депутатлари томонидан учинчи ўқишда қабул қилиниб, Сенатга юборилганди.