Ярим йилда Қирғизистон хорижга атиги 190,7 кг олтин сотди

2026-йилнинг январ–июн ойларида Қирғизистоннинг қимматбаҳо металлар ва улардан тайёрланган маҳсулотлар бўйича ташқи савдосида катта номутаносиблик юзага келган: хориждан харид қилинган маҳсулотлар экспортидан 93,47 баравар кўп бўлган. Бу ҳақда Қирғизистон Миллий статистика қўмитаси маълумотларида айтилган.

Экспорт ҳажми 680,6 минг доллар бўлган бўлса, импорт 63 миллион 617,5 минг АҚШ долларига етган. Хориждан олиб кирилган маҳсулотлар орасида энг катта улуш Қозоғистондан келтирилган хом олтинга тўғри келган. Унинг умумий қиймати 54 миллион 297,1 минг долларни ташкил қилган.

Олтин савдосидаги асосий ўзгаришлар

2026-йилнинг биринчи ярмидаги асосий ўзгариш — Қирғизистон қимматбаҳо металлар ва заргарлик буюмларининг соф импортчисига айланган. Хом олтин импорти 404,57 килограммни ташкил этган бўлса, унинг экспорти деярли тўхтаган. Хорижга бор-йўғи 190 килограмм 765,1 грамм олтин сотилган. Унинг умумий қиймати атиги 2,1 минг доллар бўлган. 2025-йилнинг шу даврида эса хом олтин экспорти 211,8 минг долларни ташкил этган.

Заргарлик буюмлари импорти ҳам камайган: 2025-йилдаги 5,3 тоннадан 2026-йилда 2,2 тоннага тушган. Шунга қарамай, уларнинг пулдаги қиймати юқори бўлиб, 9 миллион 202,2 минг долларни ташкил қилган.

Экспортда эса асосий ўринни кумуш эгаллаган. Унинг 99,98 фоизи Швейцария бозорига юборилган.

Нимани ва қаерга сотишган?

2026-йилнинг биринчи ярмида Қирғизистондан қимматбаҳо металлар, уларнинг чиқиндилари ва заргарлик буюмларининг умумий экспорти атиги 680,6 минг долларни ташкил қилган. Экспортда биринчи ўринда кумуш бўлган. Хорижга 215 килограмм 139,2 грамм кумуш маҳсулотлари 641,6 минг долларга сотилган. Унинг асосий харидори Швейцария бўлган.

Қимматбаҳо металлардан тайёрланган заргарлик буюмлари экспорти эса атиги 32 минг доллар бўлган. Уларнинг асосий харидори Хитой ҳисобланади.

Шунингдек, қимматбаҳо металларнинг чиқиндилари ва ломлари ҳам экспорт қилинган — қарийб 100 килограмм маҳсулот 4,9 минг долларга сотилган. Таqqослаш учун: 2025-йилнинг биринчи ярмида бу кўрсаткич 2,8 тоннани ташкил этган. Бу маҳсулотларнинг ҳам деярли барчасини Хитой сотиб олган.

Хом олтин экспорти ҳам жуда кам бўлган — 190 килограмм 765,1 грамм. Унинг асосий қисми Туркия ва Буюк Британияга юборилган.

Олтин ва маҳсулотлар қаердан олиб келинади?

2026-йил январ–июн ойларида Қирғизистонга қимматбаҳо металлар ва улардан тайёрланган маҳсулотлар импорти 63 миллион 617,5 минг долларга етган. Шу даврда мамлакатга 404 килограмм 574,9 грамм олтин, 2,2 тонна заргарлик буюмлари, 2 килограммдан бироз кўпроқ кумуш ва 200 килограмм бошқа маҳсулотлар олиб кирилган.

Импортда мутлақ етакчи — хом олтин бўлган. Қирғизистонга 54 миллион 297,1 минг долларлик 404 килограмм 574,9 грамм хом олтин олиб кирилган. Унинг асосий етказиб берувчиси Қозоғистон бўлган.

Ярим йил давомида Қирғизистонга қимматбаҳо металлардан тайёрланган 2,2 тонна заргарлик буюмлари олиб кирилган. Уларнинг қиймати 9 миллион 202,2 минг доллар бўлган.

2025-йилда эса заргарлик буюмлари импорти 5,3 тоннани ташкил қилган. Асосий етказиб берувчи Туркия бўлган. Шунингдек, Италия, Россия ва Хитойдан ҳам Қирғизистонга оз миқдорда заргарлик буюмлари олиб келинган.

Олтин савдосидаги якуний ҳолат қандай?

Қирғизистоннинг 2026-йил биринчи ярмида қимматбаҳо металлар ва улардан тайёрланган маҳсулотлар бўйича ташқи савдо баланси мамлакат фойдасига бўлмаган.

Умумий экспорт: 680,6 минг доллар.
Умумий импорт: 63 миллион 617,5 минг доллар.
Савдо баланси: 62 миллион 936,9 минг доллар миқдорида дефицит.

Импортнинг экспортдан 93,47 баравар кўп бўлиши мамлакатда қимматбаҳо металларга бўлган ички эҳтиёж ошганини кўрсатади. Бунга аҳолининг заргарлик маҳсулотларига бўлган юқори талаби, шунингдек, Қозоғистондан банк металлари ва олтин харид қилиниши сабаб бўлаётгани таъкидланган.