Зеленский Путинни Гитлерга қиёслаган байрам мурожаатини эълон қилди

Украина президенти Владимир Зеленский Иккинчи жаҳон урушида нацизм устидан қозонилган Ғалаба ва Хотира куни муносабати билан мурожаат йўллади. Унда Зеленский украинлар гитлерга қарши коалиция таркибида фашизмга қарши курашда катта ҳисса қўшганини таъкидлади.

Унинг айтишича, миллионлаб украинлар турли фронтларда хизмат қилган ва нацистлар Германияси устидан қозонилган ғалабада муҳим рол ўйнаган.

Россияга нисбатан кескин баёнот

Украина раҳбари Россиянинг Украинага қарши урушига ҳам тўхталиб, замонавий дунё яна «ёвузликни тўхтатишга» мажбур бўлаётганини билдирди.

«Афсуски, 81 йил ўтгач, биз яна ёвузликни тўхтатишга мажбур бўлмоқдамиз. Бу ҳам вайронагарчилик ва зулмдан бошқа ҳеч нарса келтирмайдиган, худди ўша нафрат мафкурасига асосланган мутлақ ёвузликдир. У «Россияда ишлаб чиқарилган» деган тамғага эга нацизмнинг янгиланган талқинидир»,— деди у.

Зеленский ўз мурожаатида Украинага ёрдам бераётган давлатлар ва халқларга алоҳида миннатдорлик билдирди. Унинг таъкидлашича, Путин сиёсатидан ҳимояланиш Иккинчи жаҳон урушида фашизмга қарши курашганлар хотирасига ҳурмат рамзи ҳисобланади.

«Одамлар ҳаёти ва халқлар эркинлигини Путиндан ҳимоя қилиш — бу Гитлерга Европа ва дунёни босиб олишига йўл қўймаганлар хотирасини муносиб улуғлашдир», — деди Украина президенти.

Совет андозасидан воз кечиш

Россия билан уруш фонида Киев Иккинчи жаҳон уруши хотирасини нишонлаш бўйича советча ёндашувдан воз кечган.

Аввал Украинада 8 май Хотира ва ярашиш куни, 9 май эса Нацизм устидан қозонилган ғалаба куни сифатида нишонланарди. Бироқ 2023 йилда расмий Киев 9 май байрамини бекор қилган.