Зеленский: «Хитойсиз Путин Россиясининг қўлидан ҳеч вақо келмасди»

Украина президенти Володимир Зеленский БМТ Хавфсизлик Кенгашида сўзга чиқиб, Россиянинг Хитойга тўлиқ боғлиқлигини таъкидлади. Унинг фикрича, Хитой бугунги урушни тўхтатиш имконига эга, аммо унда жимлик ва ўзини четга олиш позицияси ҳукм сурмоқда. «Хитойсиз Путин Россиясининг қўлидан ҳечвақо келмасди. Аммо Пекин тинчлик учун ҳаракат қилиш ўрнига, ҳали ҳам сукутда», — деди Зеленский. У АҚШ томонидан илгари сурилган барча тинчлик ташаббусларини Киев қўллаб-қувватлаганини, аммо Москва доимо рад жавобини берганини ёдга олди. Зеленский Россия президенти Владимир Путинни шахсий мулоқотдан қочишда айблади.

«Бу ерда Россия вакили бор, аммо қарор қабул қиладиган киши йўқ. У Украина ва жаҳон билан юзма-юз ўтиришдан қўрқади», — деди у.

Украина раҳбари Путиннинг хорижий сафарлари ҳам дипломатия эмас, балки вақт ютиш учун хизмат қилаётганини қўшимча қилди. Унинг сўзларига кўра, Россия раҳбари ўзини тинчлик истаётгандек кўрсатиб, амалда урушни чўзишга интилаяпти. Fox News билан суҳбатда Зеленский Киев Россия билан бир неча нейтрал мамлакатларда — Австрия, Швейцария, Туркия, Қатар, Саудия Арабистони ва Қозоғистонда музокара ўтказишни таклиф қилганини маълум қилди. Аммо Москва бу таклифларга рози бўлмаган. Аввалроқ АҚШ президенти Доналд Трамп Путин билан Аляскадаги саммитдан сўнг, урушни тўхтатиш учун икки етакчи учрашиши зарурлигини айтган эди. Бироқ Путин Зеленский билан музокарани «мантиқсиз» деб атади ва Россия босиб олган ҳудудлар масаласида келишувга йўл йўқлигини билдирган. Bloomberg манбаларига кўра, Путин Аляскада Трампнинг урушга жиддий аралашиш нияти йўқлигини англаб етган ва бу унга Киевни Кремл шартлари асосида музокарага мажбурлаш учун эскалацияни кучайтиришига туртки берган.